Адвокатлар энди судья бўлади ва нотариус бўлиш талаблари ўзгартирилди

Ўзбекистон Республикасида адвокатлар судья сифатида фаолият олиб бориш ҳуқуқига эга бўлади. Бу ҳақда Kun.uz мухбири хабар бермоқда.

Ўзбекистон Республикаси Олий Мажлиси Сенатининг ўн олтинчи ялпи мажлисида сенаторлар маъқуллаган «Юридик ёрдам ва ҳуқуқий хизматлар кўрсатиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунга кўра, эндиликда адвокатлар халқаро тижорат арбитраж ва ҳакамлик судларида судья лавозимида фаолият юритиш ҳуқуқига эга бўлади.
Қонун билан адвокатларга медиатор сифатида, шартнома асосида муассасаларнинг юридик хизматида фаолият юритиш ҳуқуқи берилмоқда.

Бундан ташқари мажлисда «Юридик ёрдам ва ҳуқуқий хизматлар кўрсатиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Ўзбекистон Республикаси қонунини кўриб чиқилди.

«Нотариат тўғрисида»ги қонунга киритилган ўзгартиш ва қўшимчаларга мувофиқ, йигирма беш ёшдан кичик бўлмаган, олий юридик маълумотга, юридик мутахассислик бўйича камида уч йиллик иш стажига эга бўлган, шу жумладан, нотариал идорада камида бир йил стажировка ўтаган, малака имтиҳонини топширган Ўзбекистон Республикаси фуқароси нотариус бўлиши мумкин.

Судьялик лавозимида камида беш йил ишлаган ёки нотариус ёрдамчиси ёхуд адлия органларининг нотариал фаолиятга раҳбарлик қилиш ва ушбу фаолиятни назорат қилиш билан боғлиқ лавозимларда камида уч йил ишлаган шахслар учун стажировкадан ўтиш талаб қилинмайди. “Замин” янгиликларини “Youtube”да кузатиб боринг