Хусусий боғча мудираси инжиқланаётган 1 яшар гўдакни калтак ёрдамида тинчлантиргани аниқланди

Воқеа Тошкент шаҳар Яккасарой туманидаги «Baby Univer» хусусий болалар боғчасида юз берган. 2016 йил 10 декабрида дунёга келган Маҳмудов Давроннинг онаси шу ҳақда тегишли ташкилотга шикоят аризаси билан мурожаат этган. Боланинг онаси Мадина Маҳмудованинг айтишича, шу йил 6 сентябр соат кундузги 15:30 да фарзандини олиб кетиш учун боғчага ташриф буюрган. Худди ўшанда боланинг юз, бурнининг устки қисмида кўкарган жойларни кўриб қолган.

Суриштирганда, боғча мудираси Даврон бошқа бола билан муштлашиб қолганини айтган. Аммо она бу гапга ишонмаган. Тегишли жойга мурожаат этган. Тиббий экспертиза кўкарган жойлар ёши улуғ одамнинг қўл зарбалари ҳосиласи эканини аниқлаб берган. Натижа шундай бўлганки, қўл зарбалари боғча мудираси А. Г. га тегишли бўлиб чиққан.

Яккасарой туман суди айбдорга нисбатан жазо белгилади. У энг кам иш ҳақининг уч баробари миқдоридаги жаримага тортилди. Аммо боғча мудираси айбини тан олиб боланинг яқинларидан узр сўраган бўлса-да, жабрланувчи томон жазодан норози эканини баён қилди.

Манба: uznews. uz «Замин»ни Telegram’да ўқинг!