Ўзбекистон фуқароларини Кореяга ишга юбориш бўйича янги тизим тақдимоти ўтказилди

1 июнь Ўзбекистон фуқароларини кейинчалик Корея Республикасида ишга жойлаштириш учун корейс тили бўйича тест синовидан ўтказиш тартибидаги ўзгаришлар ҳақида очиқ тақдимот бўлиб ўтди. Бу ҳақда Бандлик ва меҳнат муносабатлари вазирлиги матбуот хизмати хабар қилди.

Мазкур ўзгаришлар уч муҳим тамойилга асосланган:
– Коррупция ва монополияга йўл қўймаслик;
– Шаффофлик;
– Жамоат назорати.

Нималар ўзгарди?

Биринчи, EPS-TOPIC’ка кириш учун корейс тилини билиш бўйича саралаш тестларни ўтказиш ҳуқуқи барча тадбиркорлик субъектларига берилди. Мазкур фаолият билан шуғулланиш учун Бандлик ва меҳнат муносабатлари вазирлигидан Билимни баҳолаш маркази сифатида аккредитациядан ўтиш зарур. Ҳозирги кунда Андижон ва Самарқанддан иккита ташкилот аккредитациядан ўтди. Билимни баҳолаш марказлари рўйхати қуйидаги манзил бўйича жойлаштирилган.

Иккинчи, EPS-TOPIC’ка кириш учун ўтказиладиган саралаш тест синовлари натижалари 1 июндан бошлаб, динамик рейтинг кўринишида очиқ ҳолда test.mehnat.uz сайтига жойлаштириб борилади. Рейтингдаги ўринлар тўпланган баллардан келиб чиқиб шаклланади.

Учинчи, EPS-TOPIC’ка кириш учун ўтказиладиган саралаш тест синовларида фойдаланиладиган саволлар очиқ ҳолда қуйидаги манзилга жойлаштирилган.

Тўртинчи, EPS-TOPIC тест синовларидан ўтган ҳар бир фуқаро ўзининг Корея Республикасида ишга жойлашиш статуси ҳақида янги ишга туширилган korea.mehnat.uz сайти орқали маълумот олиши мумкин.

Мазкур ўзгаришлар тест ўтказиш ва Ўзбекистон фуқароларини Корея Республикасида ишга жойлаштириш, шунингдек, саралашда ҳамма учун бирдек шароит яратиш жараёнларининг шаффофлигини таъминлашга қаратилган. “Замин” янгиликларини “Youtube”да кузатиб боринг