Меҳнат вазирлиги 1 февралдан бошлаб киритиладиган тариф ставкалари миқдорини эълон қилди

Бандлик ва меҳнат муносабатлари вазирлиги 2020 йил 1 февраль кунидан бошлаб киритиладиган тариф ставкалари миқдорини эълон қилди.

Маълумотда тариф разрядлари, Вазирлар Маҳкамасининг 2019 йил 16 сентябрдаги 775-сон қарори 1-иловасида белгиланган ЯТСнинг тариф коэффициентлари ва президентнинг 2019 йил 30 декабрдаги ПҚ-4555-сон қарори 7-банди ва Вазирлар Маҳкамасининг 2019 йил 16 сентябрдаги 775-сон қарори билан тасдиқланган тариф коэффициентлари асосидаги, 2020 йил 1 февралдан бошлаб киритиладиган тариф ставкалари сўмда келтирилган.

2020 йил 1 февралдан бошлаб бюджет муассасалари ва ташкилотлари ходимларининг иш ҳақи, пенсиялар, стипендиялар, нафақалар ҳамда кам таъминланган оилаларга бериладиган моддий ёрдам миқдори 1,07 баробарга оширилади.

2020 йил 1 февралдан бошлаб Ўзбекистон Республикаси ҳудудида:
- меҳнатга ҳақ тўлашнинг энг кам миқдори — ойига 679 330 сўм;
- пенсияни ҳисоблашнинг базавий миқдори — ойига 238 610 сўм;
- энг кам ёшга доир пенсиялар — ойига 466 680 сўм;
- болаликдан ногиронларга бериладиган нафақа — ойига 466 680 сўм;
- зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақа — ойига 286 390 сўм этиб белгиланди.

Солиқлар, йиғимлар, жарималар, давлат божлари ва кўрсатилаётган давлат хизматлари, тадбиркорлик фаолиятининг муайян тури билан шуғулланиш учун патент (лицензия) тўловлари ҳамда қонун ҳужжатларида белгиланган бошқа тўловлар миқдорини аниқлашда қўлланиладиган базавий ҳисоблаш миқдори — 223 000 сўм ўзгаришсиз қолдирилди. “Замин” янгиликларини “Telegram”да кузатиб боринг