Кампирнинг гумони…

Одам боласининг ўта ваҳшийликка қўл уришига нима сабаб бўлади? Буни биргина сўз билан ифодалаб бўлмаса керак. Йиллаб давом этаётган нохуш гап-сўзлар, ўзаро ҳурматнинг йўқолиши бундай дилхираликлар содир бўлишига туртки бўлади.

Абдулла Жалилов (исм-фамилиялар ўзгартирилган) етмиш ёшни қоралади. Турмуш ўртоғи Манзура момо билан тўрт фарзандни вояга етказишди. Йиллар ўтиб бобо-момо бўлиб фарзанду набираларига ўрнак бўлиш ўрнига чолу кампир арзимаган баҳона билан уришиб, тортишар эди. Эр-хотиннинг ўртасидаги бундай жанжаллар бошланганига анча бўлган.

Қолаверса, катта ўғлининг уй масаласидаги тортишувлари қўшимча бўлди.

Ўша куни Абдулла бобонинг туғилган куни эди. Эрталабдан уйдан чиқиб кетди. Ўзини-ўзи хурсанд қилиб, каналга бориб чўмилди. Кейин бир кафега кириб овқатланди. Спиртли ичимлик ҳам ичиб олди. Уйга қайтаётиб, маҳалладошларининг шахмат ўйинини бироз кузатди. Соат тахминан 18:00 ларда уйига яқинлашди. Йўлакда келини Хуморага дуч келди.

Эр-хотин ва уч боласи улар билан бирга яшайди.
– Онам уйда сиздан хафа бўлиб ўтирибди, – деди келини.

Абдулла бобо уй кийимларини кийиб, меҳмонхонага ўтди. Икки набираси болалар боғчасида, кенжаси ҳали жуда кичкина. Манзура момо хонада ёлғиз эмас, катта қизининг ўғли Олим бувисининг телефонини ўйнаб ўтирганди.

У хонага киргандан сўнг яна тортишув бошланди. Манзура момо ёнидаги набирасини ҳам унутди. Келинининг шаънига ҳақоратли сўзлар айтди. Гапларнинг бир учи қайнотага тегарди.

– Бўлди қил. Бу гапларингни бирор ким эшитса, ўғлимизнинг оиласи бузилиб кетади.
– Бузилса бузилар. Нимага доим шунинг ёнини оласиз? Бирор гап борми ёки? – Манзура момо жаҳлига эрк берди.

Бу гап қанчалик ҳақиқатга яқин, буёғи бизга қоронғу. Лекин кампирнинг оғзидан бир гап чиқди, эшитган қулоқ ларзага келади: «келиннинг боласи сиздан, ўртангизда бир гап бор».

Абдулла бобонинг тепа сочи тикка бўлди. Аёлининг гапларидан жони бўғзига келди.
Кампири бу гап билан чекланмади. Анча ҳақорат ёғдирди.

Узоқ йиллардан бери давом этаётган ўзаро ҳурматсизлик, қолаверса, танасидаги спиртли ичимлик ўз кучини кўрсатди. Абдулла бобони кучли нафрат ўз измига олди. Стол устида турган пичоқни олиб кампирига ўқталди.

– Бўлди қил дедим, оғзингни ёп. Бўлмаса ҳозир шуни тиқиб оламан!
– Эркак бўлсанг ўлдир, қўлингдан келадими? – деди кампир чолига тик боқиб.

Абдулла бобо аёлининг гапларини эшитмади. Унинг устига чиқиб, дуч келган жойига пичоқ санчди. Ўзига келганда эса кампир қонга беланиб ётганди.

Уларнинг жанжалидан қўрқиб қолган Олим тезда онасига қўнғироқ қилди. Аммо онаси етиб келгунча бўлар иш бўлганди. Шундан сўнг янгасига қўнғироқ қилди.

Абдулла бобо шу пайтнинг ўзида ИИБга бориб, бўлган воқеани сўзлаб берди.
Етиб келган тез ёрдам ходимлари Манзура момонинг вафот этганини айтди.

Суд мажлисида Абдулла бобо кампирини ўлдириш нияти бўлмаганини, унинг гаплари эркаклик шаъни ва ғурурига тегиб кетгани учун жаҳлга эрк бериб юборганини, ҳозир қилмишидан қаттиқ пушаймон эканини, ёшини инобатга олиб қонуний енгиллик берилишини сўради.

Суд ҳукми билан Абдулла Жалилов 13 йилга озодликдан маҳрум қилинди. Жазони умумий тартибли калонияда ўтайдиган бўлди.

Ҳа, бу ҳаётда нималар бўлмайди дейсиз. Торга тор, кенгга кенг дунё деганларидай, ёши бир жойга бориб қолган, пиру бадавлат ёшдаги бу кимсалар наҳотки йиллар давомида турмушнинг баланд-паст сўқмоқларидан сабоқ олмаган бўлса. Бир томондан спиртли ичимлик таъсири, бошқа томондан жаҳлини жиловлаёлмагани Абдулла Жалиловни панжара ортига етаклади.

Ёшлар хатога йўл қўйса, уларни ёш, турмуш зарбалари олдида ожиз деймиз. Аммо ёши улуғ бу каби кимсаларга на панду насиҳат қилиб бўлади, на дашном бера олади одам. Хулоса ўзингиздан. Ҳеч кимни жаҳл, нафрат йўлдан адаштирмасин.


Манба: Huquq.uz «Замин»ни Telegram’да ўқинг!