18:52 / 06.05.2021
1 689

Қамоқдаги Рашид Қодиров мато цехида, Ихтиёр Абдуллаев эса чинни цехида ишлаётгани маълум бўлди

Қамоқдаги Рашид Қодиров мато цехида, Ихтиёр Абдуллаев эса чинни цехида ишлаётгани маълум бўлди

Рашид Қодиров ва Ихтиёр Абдуллаев
Омбудсман бошчилигидаги мониторинг гуруҳи навбатдаги текширувни 6 май куни 22-сонли жазони ижро этиш муассасасида ўтказди.
Бу муассаса – ҳуқуқни муҳофаза қилиш органларининг собиқ ходимлари учун мўлжалланган. Хусусан, Ўзбекистоннинг собиқ бош прокурорлари – Рашиджон Қодиров ва Ихтиёр Абдуллаев ҳам шу ерда сақланмоқда.
Собиқ бош прокурор ўринбосари Улуғбек Суннатов ва Улуғбек Хуррамов, шунингдек, собиқ МХХ катта зобити Жавдат Шарифхўжаев ҳам шу ерда жазо муддатини ўтаяпти.

 Фото: Инсон ҳуқуқлари бўйича вакил (омбудсман)
 Фото: Инсон ҳуқуқлари бўйича вакил (омбудсман)
Фото: Facebook / Abdurakhmon Tashanov
 Фото: Инсон ҳуқуқлари бўйича вакил (омбудсман)
Мониторингда қатнашган инсон ҳуқуқлари фаоли, «Эзгулик» жамияти раиси Абдураҳмон Ташанов қамоқхонада собиқ бош прокурорлар билан суҳбатлашганини маълум қилди.

Фото: Facebook / Abdurakhmon Tashanov
«Аввал мамлакатимизга уч муддат бош прокурорлик қилган Рашиджон Қодиров билан суҳбатлашдик. У кишидан шароитлар, маҳкумларга муомала ҳақида сўрадим. Ҳар ҳолда ҳушёр одам – яқин бир ойда манзил колонияга чиқишини, шикоятлари йўқлигини, БМТ структураларига қийноқлар бўйича шикоят қилмаганини, соғлиғи яхшилигини айтди. «Юрак бўйича аввалроқ сангородда даволангандик, ҳозир ҳаммаси яхши», – деди Қодиров.
«Кўрдикки, собиқ бош прокурор Рашиджон Қодиров ҳозирда тикув цехида ишламоқда. Унинг қўлидан чиққан гулдор матолардан тикилган бежирим аёллар кўйлаги, лозими ва бошқа ашёлар кўзни қувонтиради», – дея ёзади у.

 Фото: Инсон ҳуқуқлари бўйича вакил (омбудсман)
Ҳуқуқ фаоли Ихтиёр Абдуллаевни чинни цехида идишга нақш солаётган жараёнда учратганини айтган.
«Собиқ бош прокурорга унинг отаси ва ўғли бир қанча ОАВ орқали жамиятчилик ва президентга мурожаат қилгани, унга нисбатан қийноқлар қўлланилгани ва ҳозирда уни яқинлари билан кўриштиришмаётгани, изоляцияда сақланаётгани ҳақида баёнотлар беришаётганини айтдим.

У киши «ҳаммаси яхши бўлади, бу гаплар президентимизга етиб борса, адолат қиладилар»дан нарига ўтмади.
Таъкидлаш керакки, икки собиқ бош прокурор ҳам ўта эҳтиёткорлик билан муомалада бўлди. Тўғрироғи, комиссияларнинг нималиги, қаергача бора олишини ўтмишдаги фаолияти орқали яхши биладиган бу мулозимлар вазиятни мураккаблаштириб ўтиришмади. Ҳар ҳолда менга шундай туюлди
», – дея ҳикоя қилади Абдураҳмон Ташанов.

Фото: Facebook / Abdurakhmon Tashanov
Фото: Facebook / Abdurakhmon Tashanov
 Фото: Инсон ҳуқуқлари бўйича вакил (омбудсман)
Унинг қайд этишича, ЖИЭМнинг тиббий бўлимига кириб, Ихтиёр Абдуллаевнинг тиббий картаси билан танишган. Ҳужжатга кўра, Абдуллаев ЖКнинг 242- ва 301-моддалари билан 16 йилга озодликдан маҳрум қилинган. Яқин орада икки марта ўтказилган ковид тести манфий чиққан. Бўйин умуртқа поғона қисмидаги оғриқдан шикоят қилган.

Кўзининг кўриш даражаси биринчи кўзда +1 ва иккинчи соҳада +2,58. Тиббиёт қисми оккулистининг айтишича, Абдуллаев 2017 йилда Германияда кўз гавҳарларини алмаштириш билан боғлиқ жарроҳлик амалиёти ўтказган. Яъни кўз хасталиги тергов ёки зонада орттирилмаган, дея қайд этган «Эзгулик» жамияти раиси.

Фото: Facebook / Abdurakhmon Tashanov
«Цехлардан чиқаётиб, собиқ МХХ полковниги Жавдат Шарифхўжаев билан кўришдим. У гапни қисқа қилиб, ҳеч қандай шикояти йўқлигини таъкидлаган ҳолда қочиб қолди...
Яна бир маълумот. Ижтимоий тармоқларга яхши таниш бўлган МХХ полковниги Нодир Тўрақулов яқин-яқингача шу ерда экан – Жаслиққа (умрбод)га ўтказишибди. Ҳамтовоғи Шуҳрат Ғуломовнинг олдига кетибди
», – дейди ҳуқуқ фаоли.

1700 нафар маҳкумни сақлашга мўлжалланган мазкур колонияда ҳозирги кунда 273 нафар маҳкум жазо муддатини ўтамоқда.
«Умуман, колониядаги манзара мени қониқтирди. Масалан, сиёсий аҳамиятга молик бўлгани учун бош прокурорларга алоҳида мулозамат ёки кузатув йўқ. Алоҳида ош-овқат ҳам ажратилмаган. Кўпчилик нима бўлса, шу.
Колониянинг каттагина қисми таъмирда экан. Ошхонадаги ош-овқатлар ёмонмас. Кутубхона, спорт заллари ва зерикиб қолмаслик ва пул топиш учун ташкил қилинган цехлар шулар жумласига киради.
Ғалатироқ таассуротлар билан қайтдим. Бир пайтлар у билан суҳбатлашиш, сўроққа тутиш тугул олдига бора олмаганимиз бу одамлар бугун маҳзун, аввалги салобатдан асар ҳам йўқ...
» – дейди Абдураҳмон Ташанов.

Унинг қайд этишича, колониянинг бошқа турдошларидан шароит нуқтайи назаридан деярли фарқи йўқ. Қамохоналарга белгиланган стандартлар асосида тиббиёт, ўқув, овқатланиш ва ишлаб чиқариш бўлимлари ташкил қилинган. Спорт машғулотлари учун алоҳида шароитлар бор.
Хуллас, қамоқхона шароити, умумий аҳвол, маҳкумларга муносабат масаласида муаммолар кўпам кўзга ташланмайди, дея хулоса қилади инсон ҳуқуқлари «Эзгулик» жамияти раиси.

Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)


Янгиликлар » Жамият » Қамоқдаги Рашид Қодиров мато цехида, Ихтиёр Абдуллаев эса чинни цехида ишлаётгани маълум бўлди