Италиялик машҳур модельер, тадбиркор ва мода оламининг афсонавий намоёндаларидан бири, Жоржио Армани 92 ёшида оламдан ўтди. Унинг вафоти нафақат Италияда, балки бутун дунёда мода ишқибозлари ва саноат вакиллари учун катта йўқотиш бўлди.
Жоржио Армани 1934 йилда Италиянинг Пиаченца шаҳрида дунёга келган. Унинг болалик ва ўсмирлик даври жанг йилларига тўғри келган бўлса-да, у ўзидаги салоҳият ва орзулар орқали катта натижаларга эришди. Армани бойлик жиҳатидан Италиянинг энг нуфузли кишилари қаторига кирган бўлиб, унинг мулки 12 миллиард доллардан ортиқ деб баҳоланарди.
Армани мода оламидаги илк қадамларини Миландаги универмагда оддий ойна устаси сифатида бошлаган. Унинг меҳнатсеварлиги ва орзуларга интилиши натижасида қисқа вақт ичида дунёга машҳур компанияларда ишлаш имконига эга бўлди. У Nino Cerruti компаниясига қўшилиб, у ерда эркаклар кийимлари устида ишлади. Кейин эса Zegna ва Loewe каби брендлар учун ижод қилди.
1975 йилда Армани ўзининг бизнес шериги Сержио Галеотти билан бирга “Giorgio Armani” компаниясини таъсис этди. Бу бренд жаҳон модасида янги саҳифани очиб, тез орада мода индустриясининг энг нуфузли тимсолларидан бирига айланди.
Жоржио Армани оддий дизайнлар ва қулайликни рағбатлантирган услуби билан машҳур эди. Унинг кийимлари нафақат модалар намойишларида, балки Голливуд юлдузлари, сиёсатчилар ва спортчилар гардеробида ҳам доимий ўрин олди.
«Замин»ни Telegram’да ўқинг!
