Ҳожибой Тожибоев қизи “Отаси номига лойиқ эмас” деган гапларга жавоб

Машҳур ҳазил устаси, марҳум Ҳожибой Тожибоевнинг қизи Мадина Тожибоева турмушга чиқди. Унинг йўлдоши — актёр ва хонанда Ислом Мансуров, ижодий дунёда “Узтим” тахаллуси билан танилган. Жуфтликнинг муносабати ва тўйи кўпчиликнинг қизиқишига сабаб бўлди, айниқса, улар ҳақида тарқалган турли миш-мишлар кенг муҳокамаларга сабаб бўлди.

Исломнинг айтишича, улар карантин пайтида танишган. Жонли эфирда пул топиш ҳақида суҳбат олиб борганида Мадина савол берган ва шу орқали танишув бошланган. “Биринчи кўрганимдаёқ шу қиз менинг бўлади, деб ўйладим. Бир ҳафтадан кейин унга севгимни изҳор қилдим”, — дейди у.

Бироқ ижтимоий тармоқларда Мадина “иккинчи аёл” сифатида турмушга чиққан деган изоҳлар ҳам пайдо бўлди. Бунга сабаб Исломнинг 33 ёшга киргани ва унга нисбатан турли шубҳалар бўлгани айтилади. Мадина эса бунга ҳам ойдинлик киритди: “Ёлғон миш-мишларга ишонмаслик керак. Мен Исломнинг оиласи бор деб ўйлаб қўрққан пайтларим ҳам бўлган. Аммо у барчасини изоҳлаб берди”, — деди келин.

Куёвнинг айтишича, унга нисбатан айтилган шубҳалар видеолар орқали пайдо бўлган. У ўз жиянларини видеоларга чиқаргани учун одамлар “қизи” деб ўйлаб қолган. “Ҳеч қачон оила қурмаганман. Фақат тўғри одамни топмаганман”, — деди Ислом.

Тўй маросимида кўпчилик ижобий фикр билдирган бўлса-да, келин кўйлаги ҳақида салбий изоҳлар ҳам бўлди. Мадина бу ҳақда очиқ гапирди: “Отасининг номига лойиқ бўлмабди деган қарғишлар эшитдим. Лекин мен очиқ-сочиқ кийим киймаганман. Қарғашлардан кўра, кўпчилик мени тўйдаги энг замонавий либос эгаси сифатида мақтади. Бировнинг фикри билан яшаш ниятим йўқ”, — деди у.

Ислом эса турмуш ўртоғини қўллаб-қувватлаб, “Бу нарсани ҳеч кимга исботлаш шарт эмас. Асосийси, мен унинг ёнида эдим. Негатив фикрлар ёзадиганлар ҳаётида натижага эришмаган одамлар. Уларнинг гапини парво қилиш шарт эмас”, — дея изоҳ берди.

Ёш жуфтликнинг тўйида ўзбек шоу-бизнеси вакиллари ҳам қатнашди. Улар рақсга тушган пайтда ҳам салбий изоҳлар бўлди, аммо Ислом ва Мадина бунга жиддий эътибор қилмаган. “Тўйимиз бир марта бўлади, нега ўйнамадик деб афсусланишни истамадик. Шунинг учун ҳам чиқиб, чин дилдан рақсга тушдик. Биз табиатан шўх жуфтликмиз”, — дейишди улар.

Мадина никоҳ оқшомида отасининг шогирди Валижон Шамшиев уни ота сифатида кузатиб қўйганини ҳам эслаб ўтди. Жуфтлик фикрига кўра, улар тўйда борича бўлишни хоҳлашган ва шунинг учун ҳам танқидларга парво қилмасдан, самимийликни танлашган.

Камола Шухратова

«ЗАМИН.УЗ» муҳаррири