Зарина Йўлдошева онасига берган ваъдасини очиқлади

Актриса Зарина Йўлдошева “Наво” телеканалида намойиш этилган “Меҳмонда” кўрсатувида шахсий ҳаёти, ижодий фаолияти ва оиласи билан боғлиқ таъсирли хотиралари ҳақида гапирди. Суҳбат давомида у нега ҳануз турмуш қурмагани, онасига берган ваъдаси ҳамда реклама орқали қўлга киритган катта ютуғи ҳақида очиқчасига сўзлаб берди.

Актрисанинг айтишича, у ўзини блогер эмас, аввало санъаткор сифатида кўришларини истайди. Ижтимоий тармоқларда фаол бўлса-да, унинг асосий мақсади актрисалик фаолияти орқали мухлислар меҳрини қозониш бўлган.

— Кўпчилик мени блогер сифатида қабул қилади. Лекин мен бундай аталишини унчалик ёқтирмайман. Мен учун энг муҳими — актриса сифатида танилишим, дейди Зарина Йўлдошева.

Унинг таъкидлашича, Instagram’даги кузатувчилари сони ортиши ортидан турли рекламавий таклифлар кела бошлаган. Айниқса, “Номус” сериали оммалашгач, актрисага йирик лойиҳалардан таклифлар кўпайган.

— Реклама орқали қўлга киритган энг катта бойлигим — уй бўлган. Бир қурилиш компанияси мени лойиҳа юзи сифатида танлади ва эвазига кенг хонадон тақдим қилди. Пул тез сарфланади, лекин уй инсон билан қолади, дейди у.

Суҳбат давомида актриса шахсий ҳаёти ҳақида ҳам тўхталиб, оила қуриш масаласига жиддий ёндашишини айтди. Унинг фикрича, инсон турмуш қуришдан олдин танлаган инсонини чин дилдан яхши кўриши ва унинг камчиликларини ҳам қабул қила олиши керак.

Энг таъсирли жиҳатлардан бири эса актрисанинг марҳум онасига берган ваъдаси бўлди. Заринанинг айтишича, у укалари ва синглиси учун ўз бахтини орқага сурган.

— Онам ҳаётлик пайтида укам ва синглимга қарашга кўп ёрдам берардим. Уларга ҳам она, ҳам опа бўлишга ҳаракат қилганман. Шунинг учун аввал уларни оёққа турғизиб, уйли-жойли қилишни мақсад қилдим. Онамга ҳам шу ҳақда сўз берганман, дейди актриса.

Унинг сўзларига кўра, ҳатто яқинлари “аввал сен турмуш қур” деб кўп марта маслаҳат берган. Аммо Зарина Йўлдошева ўз қароридан қайтмаганини ва аввал оила аъзоларининг келажагини таъминлашни устувор деб билганини таъкидлади.