09:50 / 04.10.2020
1 241

Тошкентда “Мендирман Жалолиддин” сериалининг тақдимоти ўтказилди

Тошкентда “Мендирман Жалолиддин” сериалининг тақдимоти ўтказилди
Бугун Tashkent City Конгресс-ҳолида “Мендирман Жалолиддин” сериалининг тақдимот маросими бўлиб ўтди. Тадбирга таклиф этилган Ўзбекистон ва Туркия маданият ва санъат арбоблари, Ўзбекистон ҳукумати вакиллари, дипломатик корпус вакилларига сериалнинг биринчи қисми намойиш этилди.

Эслатиб ўтамиз, мазкур сериал Туркиянинг “Bozdag film” компанияси томонидан суратга олинган. Davletov.uz ёзишича, съёмка учун Туркиядаги 30 гектар майдонда юртимизнинг XIII асрга оид муҳити жонлантирилган. 1200 нафар ишчи-хизматчининг меҳнати билан 3500 кв/м майдонда баландлиги 5,5 метр бўлган икки қаватли Хоразмшоҳ саройи қурилган. 200 дан ортиқ либосчилар ўзбек ва турк рассомлари эскизлари асосида минглаб тарихий костюмларни тикиб, тайёрлашган. Истанбулдан 750 км масофадаги Оқсарой музофотида саҳро жанг саҳналари суратга олинган.

Маълумотга кўра, сериалининг биринчи фасли 13 қисмдан иборат бўлиб, унинг премьераси 2021 йилнинг январь ойида телетомошабинларга тақдим этилиши режалаштирилмоқда.
Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)