Темурхўжа Абдухолиқов: “Мағлубият учун ўзимни айбдор деб биламан”

Суперлиганинг 8-тур доирасида бўлиб ўтган “Бунёдкор” – “Қўқон-1912” (1:2) учрашувидан сўнг, мезбонлар ҳужумчиси Темурхўжа Абдухолиқов ўйиндан кейинги фикрлари билан баҳам кўрди. Таҗрибали футболчи мағлубиятда ўзининг ҳам айбдор эканини очиқ тан олди.

“Бу мағлубият учун масъулиятни ўз зиммамга оламан. Ачинарлиси шундаки, биз ўйинда жиловни ҳакамга бериб қўйдик. Бунинг оқибати шундай якун билан тугади”, — деди Абдухолиқов.

“Қўқон” вақтни чўзди, биз эса ғалаба учун курашдик”

Футболчининг фикрича, “Бунёдкор” баҳсни фақат ғалаба учун ўтказган, “Қўқон-1912” эса дурангни сақлаб қолиш ниятида ҳаракат қилган. У ўйинда рақиб томонидан вақт ўтказишга уринишлар кўп бўлганини алоҳида қайд этди.

“Биз ютмоқчи бўлдик, рақиб эса кўпроқ натижани ушлаб қолишни мақсад қилганди. Қўқонликларнинг вақт чўзишга қаратилган ҳаракатларини кўрдик. Омадимиз келмади, баъзи вазиятларда бахтсиз тасодифлар ҳам ўз сўзини айтди. Лекин бу — футбол. Ҳар доим ҳам устун ўйнаган жамоа ғалаба қозонавермайди”, — дея таъкидлади 33 ёшли ҳужумчи.

“Йўқотганимиз йўқ — йўл давом этади”

Темурхўжанинг сўзларига кўра, жамоа учун бу мағлубият ҳали ҳеч қандай ҳал қилувчи аҳамиятга эга эмас. У жамоа кайфиятига таъсир ўтказишга йўл қўймаслик лозимлигини айтди.

“Биз бу ўйинда ҳеч нарса йўқотмадик. Футболда шундай паллалар бўлади. Энди эътиборни кейинги ўйинга қаратамиз. Бугун биз майдонда барча куч-ғайратимизни бердик. Аслида шу энг муҳими — курашишдан, ҳаракат қилишдан тўхтамаслик.”

Абдухолиқовнинг сўзлари жамоа руҳиятида ҳали ҳам курашувчанлик ва ишонч сақланаётганини кўрсатади. Сиз нима деб ўйлайсиз — “Бунёдкор” келгуси турда хатони тўғрилаб, қайта тиклана оладими? «Замин»ни Telegram’да ўқинг!