Муборак шаҳрининг "Машъал" клуби ёзги трансфер ойнасида ўз таркибини яна бир тажрибали легионер билан тўлдирди. Бу гал жамоа Нигериянинг машҳур вингери Умар Амину билан 1 йиллик шартнома имзолаганини эълон қилди. Клуб раҳбариятининг сўнгги қарорлари жамоа мухлислари орасида катта қизиқиш уйғотмоқда.
30 ёшли Амину ўз фаолияти давомида турли мамлакатлар ва етакчи клубларда тўп сурган. У Туркия Суперлигасида 159 учрашувда иштирок этиб, “Самсунспор”, “Османлиспор”, “Ризеспор”, “Бодрум”, “Бандирмаспор”, “Тузласпор”, “Бейкоз Анадолу”, шунингдек, Кипрнинг “Миракл Дегирменлик” жамоалари сафида майдонга тушган. Бу тажриба унга Европа футболи муҳитини яхши ҳис қилиш ва юқори даражада ҳаракат қилиш имконини берган.
Нигерия миллий терма жамоасининг собиқ аъзоси бўлган Умар Амину “Машъал”нинг ярим ҳимоясига янада куч, тажриба ва барқарорлик олиб кириши кутилмоқда. Клуб раҳбарияти ундан асосий таркибда фаол иштирок этишини ва жамоанинг юқори мақсадларига эришишда муҳим роль ўйнашини интиқлик билан кутади.
Эслатиб ўтиш керак, Амину 2016 йил Рио-де-Жанейро Олимпиадасида Нигерия миллий терма жамоаси сафида бронза медалини қўлга киритган. Бу унинг халқаро аренадаги муваффақиятларини яна бир бор тасдиқлайди.
Мухлислар эса янги вингернинг ўзини қандай намоён этишини ва "Машъал" таркибида қандай натижалар қайд этишини катта қизиқиш билан кутишмоқда. Яқин мавсумда Аминунинг ўйини жамоа ўйин услубига қандай таъсир кўрсатишини вақт кўрсатади.
