Англиянинг машҳур клуби “Ливерпуль” бош мураббийи Арне Слот яқинда жамоага қўшилган ёш ва иқтидорли Флориан Вирц ҳамда клубнинг трансфер стратегияси ҳақида ўз фикрларини билдирди. Унинг таъкидлашича, “Ливерпуль” фақатгина мавсум учун эмас, балки келажак учун ҳам пухта режалар асосида ҳаракат қилмоқда.
“Ҳа, бу ҳаракатларимиз “Ливерпуль” клуби қандай босқичда ривожланаётганини яққол кўрсатиб турибди. Биз футболчи харид қилиш масаласида юзаки ёндашувдан воз кечганмиз. Энди мақсадимиз — ёш, қобилиятли, бир неча позицияда ҳаракат қила оладиган футболчиларни жамоага жалб қилиш. Бу узоқ муддатли ва мустаҳкам лойиҳа”, — деди Арне Слот.
Мураббийнинг сўзларига кўра, клуб фақатгина мавжуд эҳтиёжни тўлдириш билан чекланмайди. Балки, жамоани ривожлантирадиган, янги руҳ олиб кирадиган футболчилар танлаб олинади. “Биз салоҳияти юқори бўлган ва жамоамизга тетиклик олиб кириши мумкин бўлган ўйинчиларни танлаб оламиз. Кейин эса уларни қўлга киритишга ҳаракат қиламиз. Флориан билан музокаралар яхши ўтди. У бизга ишонди, биз эса уни жамоамизда кўришни хоҳладик”, — деб қўшимча қилди у.
Маълумотларга кўра, “Ливерпуль” Вирцни Германиянинг “Байер” клубидан 125 миллион евро (ўзбек сўмида тахминан 1.7 трлн сўм) миқдоридаги маблағ эвазига харид қилди. Бу трансфер жамоанинг катта мақсадлари борлигини яна бир бор тасдиқламоқда.
«Замин»ни Telegram’да ўқинг!
