Футбол оламида ўз истеъдоди ва майдондаги чаққон ҳаракатлари билан миллионлаб мухлисларни ўзига ром қилган ПСЖ ҳужумчиси ҳамда яқинда «Олтин тўп-2025» соҳиби деб топилган Усмон Дембеле ўзи учун намуна бўлиб хизмат қилган футболчилар ҳақида тўхталди.
«Мен «Барселона» сафида ўйнаган вақтларимда Лионель Месси билан бирга майдонга тушганман. У кўпинча "алдамчи тўққизлик" сифатида ҳаракат қиларди. Унинг ҳар бир қадами, рақибларни чарм тўп билан алдаш маҳорати ҳақиқатан ҳам ҳайратланарли эди. Унинг пасларини қабул қилиш мен учун қийин эмасди, чунки Серхио Бускетс Мессини жуда яхши ҳис қилар ва унга аниқ узатмалар беришда маҳоратли эди. Шу сабабли у билан бирга ўйнаш катта мактаб бўлган», — деди Дембеле "France Football" нашрига берган интервьюсида.
Франциялик ҳужумчи шунингдек, ҳозирги замон футболининг икки юлдузи — англиялик Харри Кейн ва француз ҳамюрти Килиан Мбаппени диққат билан кузатишини таъкидлади. «Улар майдондаги ҳаракатлари, гол уриш қобилияти ва ўйиндаги самарадорлиги билан мен эътибор берадиган футболчилардан ҳисобланади. Улардан ўрганадиган жуда кўп жиҳатлар бор», — дея қўшимча қилди у.
Эслатиб ўтамиз, Усмон Дембеле ва Лионель Месси 2017–2021 йиллар оралиғида «Барселона» клубида бир сафда тўп тепган. Бу давр Дембеле учун нафақат профессионал ўсиш, балки жаҳон футболида энг буюклар қаторида туришга ундаган илҳом манбаи бўлгани айни ҳақиқат.
Шу билан бирга, Дембеленинг сўзлари унинг ҳали ҳам футболида янги марраларни кўзлаётганини ва ўзига намуна бўлган юлдузлардан тажриба олишга интилганини кўрсатади.
«Замин»ни Telegram’да ўқинг!
