19 ёшли ўзбекистонлик гроссмейстер Жавоҳир Синдаров шахмат оламида яна бир тарихий ютуқка эришди — у FIDE жаҳон кубогида ғолиб чиққан энг ёш чемпион сифатида тарихга кирди. Финалда рақиби, хитойлик маҳоратли шахматчи Йи Вэйни драматик тай-брейк сериясида мағлуб этган юртдошимиз умумий ҳисобда 2,5:1,5 натижа қайд этди.
Биринчи партияларда рақиблар тенг кураш олиб боришди, бироқ ҳал қилувчи онларда Синдаровнинг аниқ ҳисобланган тактикаси, жасорати ва босимга чидай олиш маҳорати унга охирги ғалабани таъминлади.
FIDE жаҳон кубоги 2000 йилдан бери ўтказиб келинади. Шу кунга қадар энг ёш чемпион ҳисобланиб келган Левон Аронян 2005 йилда 23 ёшида зафар қучган эди. Энди эса бу рекорд Синдаровга тегишли — у бор-йўғи 19 ёшда жаҳон кубогини қўлга киритди.
Ушбу зафар билан Жавоҳир нафақат мамлакат тарихида, балки жаҳон шахматида ҳам янги саҳифа очди. Мусобақада кучли учликка кирган ҳар бир шахматчи каби у ҳам 2026 йилги Жаҳон Чемпионати учун даъвогарлар турнирига расмий равишда йўлланма олди.
Эслатиб ўтамиз, амалдаги жаҳон чемпиони ҳиндистонлик Гукеш Доммаражу ҳисобланади. Синдаровнинг эса энди жаҳон тожига бўлган йўли очиқ — уни олдинда тарихий имкониятлар, катта баҳслар ва янги чўққилар кутмоқда.
Ўзбекистон шахмат мактаби яна бир бор дунёга ўз салоҳиятини намоён этди — 19 ёшли чемпион бунинг энг ёрқин исботидир.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
