Лондоннинг "Арсенал" клуби бош мураббийи Микел Артета жамоаси атрофидаги танқид, босим ва “салбий фон” ҳақида очиқ гапирди. Мутахассисга шогирдларни турли гап-сўзлардан қандай асраш мумкинлиги сўралганда, у одатдагидек юмшатиб ўтирмади: бу лигада шовқин — нормал ҳолат, ҳатто йўлнинг бир қисми.
Артетанинг фикрича, бундай муҳитда энг муҳим савол шундай: сен шу босимни хоҳлайсанми ёки йўқ? Агар йўқ бўлса, демак, футболдаги катта саҳна сенга мос эмас — бошқа иш қил, бошқа жойга ўт. Қисқаси, “катта ўйин”да катта гаплар ҳам бўлади. Шу нуқтада мураббий жамоани ҳам, мухлисларни ҳам бир фикрга чақирди: ташқи шовқинни эмас, ички тартибни назорат қилиш керак.
Бу гаплар бежиз эмас. Англия Премьер-лигасида чемпионлик пойгаси қизиб турган пайтда ҳар бир хато — мем, ҳар бир ғалаба — хайп. Айни дамда лондонликлар турнир жадвалида пешқадам, ортдан эса "Манчестер Сити" 2 очколик масофада сиқиб келяпти. Демак, ҳар тур — финалга ўхшайдиган босқич.
Энг қизиғи, бугун 22 февраль куни "Тоттенҳэм Хотспур"га қарши сафар баҳси бор. Дерби — ўз-ўзидан нерв. Бундай ўйинларда “менга ёқимли гапиринглар” деган режим ишламайди: ё тайёрсан, ё йўқ. Артета айнан шу руҳни уқтиряпти — шогирдларига қалқон қидирмай, характерни кучайтириш керак.
Мураббийнинг бу чиқиши бир нарсани кўрсатади: “Арсенал” келажакни ҳозирдан қаттиқ ушлаб олмоқчи. Чемпионликка кетаётган йўлда энг хавфли рақиб баъзан рақиб жамоа эмас — ўзингдаги иккиланиш бўлади. Шунинг учун Артета шовқиндан қочишни эмас, унга тўғри муносабатни танлаяпти: майдонда ишни қилиб қўй, қолганини “табло”нинг ўзи айтади.
“Zamin”ни Telegram'да ўқинг!
