Германия Бундеслигасининг 25-турида пешқадам «Бавария» ўз майдонида Мёнхенгладбахнинг «Боруссия»сига қарши том маънода куч намойиш қилди. «Алянц Арена»даги баҳс 4:1 ҳисобида мюнхенликларнинг йирик ғалабаси билан якунланди ва жамоа чемпионлик пойгасида яна бир қадам олдинга ташлади.
Учрашув олдидан асосий интрига — мезбонларнинг тўпурари Ҳарри Кейн жароҳат сабаб майдонга тушмагани эди. Бу янгилик мухлисларни бироз хавотирга солган бўлса-да, майдондаги воқеалар «Бавария» ҳужумда Кейнсиз ҳам ечим топа олишини кўрсатди. Қолаверса, асосий таркибнинг яна бир муҳим аъзоси Майкл Олисе ҳам ЕЧЛ олдидан эҳтиёт қилиниб, захирада қолдирилди.
Биринчи таймда «Бавария» босимни секин-аста кучайтириб борди ва 33-дақиқада Диас ҳисобни очди. Тайм тугаётган пайтда эса Лаймер 45+1-дақиқада яна бир гол уриб, жамоасини анча хотиржам ҳолатга олиб чиқди — 2:0.
Иккинчи бўлимда ўйин янада қизиди. 55-дақиқада меҳмонлар сафида Райц четлатилди ва шундан кейин «Бавария»нинг устунлиги янада яққол кўринди. 57-дақиқада Мусиала пенальтидан аниқ зарба бериб, ҳисобни 3:0 қилди. 79-дақиқада Жексон тўртинчи голни киритиб, баҳсга деярли нуқта қўйди.
Мёнхенгладбахликлар эса учрашув охирида, 89-дақиқада Моҳянинг голи билан ҳисобни “безади”, холос — 4:1. Аммо бу гол ўйин тақдирига таъсир қила олмади.
Ушбу ғалабадан кейин Компани жамоаси очколарини 66 тага етказиб, энг яқин таъқибчисини 14 очкога ортда қолдирмоқда. «Боруссия М» эса 25 очко билан 12-поғонада қолди. Демак, «Бавария» чемпионлик маррасига янада яқинлашяпти, меҳмонлар эса барқарорликни топиш учун кейинги турларда қаттиқроқ ишлаши керак бўлади.
Бундеслига. 25-тур
Бавария — Боруссия М 4:1
6 март, «Алянц Арена»
Голлар: Диас (33), Лаймер (45+1), Мусиала (57, пеналти), Жексон (79) — Моҳя (89).
Бавария: Нойер (Урбиг, 46), Лаймер (Кардозо, 61), Упамекано (Станишич, 61), Ким, Бишоф, Киммих (Дайбер, 81), Горетцка, Карл, Мусиала, Диас (Геррейру, 61), Жексон.
Боруссия М: Николас, Сандер, Элведи, Дикс, Скалли, Райц, Штогер, Кастроп (Улрих, 67), Онора (Матино, 61), Болин (Моҳя, 84), Табакович (Шародиа, 61).
Огоҳлантириш: Жексон (66).
Четлатиш: Райц (55).
Қисқаси, Кейн йўқ, Олисе эҳтиёт қилинди, аммо «Бавария» барибир катта жамоа эканини кўрсатди: ким ўйнамасин, тизим ишлаяпти.
“Zamin”ни Telegram'да ўқинг!
