UFC’нинг ўрта вазн тоифасидаги амалдаги чемпиони Ҳамзат Чимаев ММА афсонаси Хабиб Нурмагомедов билан муносабатлари ҳақида очиқ фикр билдирди. Унинг айтишича, улар ўртасида айримлар ўйлаганидек ҳеч қандай зиддият мавжуд эмас:
- "Биз Хабибга қойил қолиб улғайганмиз ва ҳали ҳам шундай", - деди Ҳамзат.
Чимаев Хабибни жуда юқори баҳолаб, уни спорт тарихидаги энг буюк жангчилардан бири сифатида таърифлади. У болалигиданоқ Хабибдан илҳом олганини, ҳозир ҳам унга нисбатан ҳурмат сақлашини айтди:
- "У тарихдаги энг буюк жангчилардан бири", - деди Чимаев.
Чемпионга кўра, ижтимоий тармоқларда улар ўртасида тушунмовчилик бор деган фикрлар тарқалган, аммо бу реал ҳолатни акс эттирмайди. Чимаев Хабибни яқин инсон сифатида кўришини таъкидлади:
- "Одамлар мен ва у ўртасида қандайдир муаммо бор деб ўйлайди, бироқ бу ҳақиқат эмас. Хабиб менга ёқади. У менинг мусулмон акам", - деди Ҳамзат Чимаев.
Унинг сўзларига кўра, иккаласи ҳам камтар шароитдан чиққан ва бир-бирини яхши тушунади. Шу боис у Хабибни “ака” деб атаб, исломий биродарлик алоқасини алоҳида қайд этди:
“ У ҳам мен каби камбағал қишлоқдан. Биз ака-ука кабимиз”, — дея Чимаев муносабатларни қисқа ва аниқ ифодалаган.
Эслатиб ўтамиз, Хамзат Чимаев навбатдаги жангини 10 май куни UFC 328 турнирида америкалик Шон Стриклендга қарши ўтказади.
