«Манчестер Юнайтед» ғалаба қилди, Фернандеш рекордга яқинлашди

Англия Премьер-лигасининг 34-турини якунлаб берган баҳсда «Манчестер Юнайтед» ўз майдонида «Брентфорд»ни қабул қилиб, муҳим ғалабага эришди. «Олд Траффорд»даги учрашув мезбонлар устунлигида ўтди ва 2:1 ҳисобида якунланди.

Ўйин бошидаёқ «қизил иблислар» ташаббусни қўлга олди. 11-дақиқада Каземиро ҳисобни очиб, жамоани олдинга олиб чиқди. Биринчи бўлим охирида эса Шешко рақиб дарвозасини яна бир бор ишғол қилиб, фарқни икки тўпга етказди.

Иккинчи бўлимда «Брентфорд» қарши ҳужумлар орқали интригани сақлаб қолишга ҳаракат қилди. 87-дақиқада Йенсен ҳисобни қисқартирди, аммо вақт меҳмонларга камлик қилди ва мезбонлар устунликни сақлаб қолди.

Учрашувда алоҳида эътибор марказида Бруну Фернандеш бўлди. У ушбу баҳсда яна бир голли узатма бериб, мавсумдаги ассистлари сонини 19 тага етказди. Шу тариқа, у Тьерри Анри ва Кевин де Брюйне ўрнатган 20 та ассистлик рекордига жуда яқинлашди.

АПЛ. 34-тур
Мкнчестер Юнайтед — Брентфорд 2:1
27 апрел, «Олд Траффорд»
Голлар: Каземиро (11), Шешко (43) — Йенсен (87).
Манчестер Юнайтед — Ламменс, Далот, Магуайр, Ҳевен, Шоу (Йоро, 74), Каземиро, Майну, Фернандеш, Мбеумо (Маунт, 74), Диалло (Мазрауи, 46), Шешко (Зиркзе, 88).
Брентфорд — Келлеҳер, ван ден Берг, Коллинз, Йенсен, Кайоде, Люис-Поттер, Ярмолюк, Дамсгор, Шаде (Нелсон, 73), Уаттара, Тиаго.
Огоҳлантиришлар: Шоу (6), ван ден Берг (40), Уаттара (71), Тиаго (76), Зиркзе (90+2), Коллинз (90+6).

Натижада Кэррик бошчилигидаги «Манчестер Юнайтед» очколарини 61 тага етказиб, турнир жадвалида 3-ўринни мустаҳкамлади. Жамоа деярли Чемпионлар лигаси йўлланмасини ҳал қилди ва кейинги турда буни расмийлаштириши мумкин.

«Брентфорд» эса 48 очко билан 9-поғонада қолди ва юқори ўринлар учун курашда имкониятларини қисқартириб қўйди.

Қисқача айтганда, «Юнайтед» ўз ишини қилди, Фернандеш эса рекордга “қадам қолди” ҳолатида.