Муҳаммад Салах Англия Премер-лигасининг сўнгги турида Брентфорд жамоасига қарши баҳсда ажойиб ассист қайд этиб, Ливерпул тарихидаги энг яхши ассистентга айланди. Мисрлик ҳужумчи ушбу кўрсаткич бўйича клуб афсонаси Стивен Жеррардни ортда қолдириб, ўзининг афсонавий мақомини яна бир бор мустаҳкамлади. Бу ҳақда Goal.com хабар беради.
Учрашувнинг 74-дақиқасида захирага олинган Салах мухлисларнинг давомли қарсаклари остида майдонни тарк этди. Ўйин давомида у Куртис Жонесга голли узатма етказиб бериб, Премер-лигадаги ассистлари сонини 93 тага етказди. Муҳаммад Салах ўнг қанотдан марказга ёриб кириб, оёқ ташқариси билан узатган пасини Жонес дарвозага аниқ йўллади.
Статистик маълумотларга кўра, Салах ўйин давомида 69 марта тўпга тегинди ва 84 фоизли аниқ узатмаларни амалга оширди. Шунингдек, у рақиб дарвозасига тўрт бор зарба бериб, бир марта тўсинни пойлаган бўлса, яна бир марта хавфли вазият яратди. Ушбу дуранг натижа Ливерпул учун келаси мавсумда Чемпионлар лигаси йўлланмасини нақд қилди.
Муҳаммад Салах Ливерпул сафидаги тўққиз йиллик фаолияти давомида 442 та ўйинда майдонга тушиб, 257 та гол уришга муваффақ бўлди. У жамоа билан икки бор Англия Премер-лигаси чемпионлигини қўлга киритди, Чемпионлар лигаси ва бошқа кўплаб совринларга эга чиқди. Шунингдек, у тўрт марта Премер-лига олтин бутсасини қўлга киритган.
Ҳозирча эркин агентга айланган юлдузнинг кейинги манзили номаълумлигича қолмоқда. У яқин вақт ичида бор эътиборини Миср терма жамоаси билан Жаҳон чемпионатига қаратади. Шундан сўнг у Европа грандлари, Туркия, Саудия Арабистони ёки АҚШ клубларидан келаётган таклифларни кўриб чиқиши кутилмоқда.
“Zamin”ни Telegram'да ўқинг!
