Самвел Бабаян: "Керак бўлса, кунига 24 соат ишлашимиз зарур"

Суперлиганинг 3-туридан ўрин олган "Навбаҳор" – "Қўқон-1912" (2:0) учрашувидан сўнг мезбон жамоа бош мураббийи Самвел Бабаян матбуот анжуманида иштирок этди.

"Ўйлайманки, "Навбаҳор"нинг ўйини стадионга келган мухлисларга манзур келди. Шу кунгача 3 та расмий ўйин ўтказган бўлсак, бугунгина имкониятларимиздан келиб чиқиб, яхшироқ тўп тепдик. Олдинда ишлар кўп. Футболчиларга раҳмат айтаман. Натижадан мамнунман. Ҳар бир ўйинда илк дақиқалардан охириги сонияларгача ишқибозларни хурсанд қилишга ҳаракат қиламиз", – дейди Самвел Бабаян.

- Кейинги турда "Навбаҳор" "Пахтакор"га қарши сафарда ўйин ўтказади. Дарҳақиқат, рақиб – жиддий жамоа. "Навбаҳор" учшбу ўйинда ҳам ғалаба қозонишни уддасидан чиқа оладими?

- Бугунги кунда бизга кейинги рақиб ким бўлишининг аҳамияти йўқ. Принципимизга кўра, ҳар бир кейинги ўйин биз учун муҳим ҳисобланади.

- "Пахтакор" ва терма жамоадаги фаолиятингиздан маълумки, турли хорижлик мураббийларнинг фалсафаларидан фойдалангансиз. Бир ҳафтадан сўнг Наманганга Сречко Катанец бошчилигидаги Ўзбекистон миллий терма жамоаси келади. Катанец билан фикр алмашиш имкониятидан фойдаланишни режалаштиряпсизми?

- Менинг фикримча, ўзимизнинг мураббийларни ривожлантиришимиз керак. Жисмоний, тактик томондан. Чунки мураббийларимизнинг салоҳияти баланд. Ҳозирда 40 га яқин мураббийларда Про-лицензияси бор. Хорижлик мураббийлар нимадир бериши керак.

Шу ўринда, қўқонлик футболчиларни ҳам мақташ жоиз. Улар доим чақилмас ёнғоқ бўлиб келган. Бугун ҳам максимал ҳаракат қилишди. Стадионга келган ишқибозларнинг кўзида қувонч кўрдик. Шунинг учун ҳам, керак бўлса, кунига 24 соат, эрталабдан тонггача ишлашимиз зарур. “Замин” янгиликларини “Youtube”да кузатиб боринг