Windows 11 ва 10 фойдаланувчилари учун муҳим янгиликлар

Microsoft компанияси Windows 11 ва Windows 10 операцион тизимлари учун катта янгиланишларни чиқарди. Феврал ойидаги 2025 йилги апдейт тизим хавфсизлигини мустаҳкамлаш ва фойдаланувчилар қулайлигини оширишга қаратилган бўлиб, муҳим хавфсизлик тузатишлари ҳамда янги функцияларни ўз ичига олади.

Windows 11 фойдаланувчилари (23H2 ва 24H2 версиялари) учун ушбу янгиланиш бир қатор инновацияларни тақдим этди. Энг диққатга сазовор янгиликлардан бири – "Explorer" (Файл менежери) ойналари автоматик тиклаш функцияси бўлиб, бу хусусият компьютер қайта ёқилганда очиқ турган файлларни қайта тиклашга имкон беради.

Нейропроцессорли (NPU) қурилмалар учун Windows Studio Effects бошқаруви вазифалар панелига киритилди. Энди шовқин бўстириш ва фон эффектларини созлаш биргина босиш орқали амалга оширилади. Шунингдек, иловалар олдиндан кўриш анимацияси яхшиланиб, интерфейс янада силлиқ ишлайди.

Геймерлар учун эса авто-HDR оптималлаштирилди – рангларнинг ҳаддан ташқари тўйинганлиги муаммоси бартараф қилиниб, визуал сифат яхшиланди. Бундан ташқари, ўйин контроллерлари уланганида компьютер секин ўчиши ва USB камералар нотўғри аниқланиши каби хатоликлар тузатилди.

Windows 10 фойдаланувчилари (19044.5487 ва 19045.5487) учун асосий янгилик – янги Outlook иловасининг автоматик интеграцияси бўлди. У тизим менюсига қўшилади, лекин мавжуд почта созламаларига таъсир қилмайди. Шунингдек, юқори ресурс талаб қилувчи иловаларда носозликларга сабаб бўлган виртуал хотира оқиш муаммоси бартараф этилди.

Ҳар икки тизим учун янгиланиш жами 55 та заифликни бартараф этади, жумладан:
CVE-2025-21391 – Windows хотирасидаги файлларни рухсатсиз ўчириш хавфи;
CVE-2025-21377 – NTLM хешларининг сизиб чиқиши ва аккаунт хавфсизлигига таҳдид;
CVE-2025-21194 – UEFI ҳимоясини айланиб ўтишга имкон берувчи хатолик.

Муттахассислар ушбу янгиланишни имкони борича тезроқ ўрнатишни тавсия этмоқда. Айрим функциялар, жумладан, "Explorer" ойналари тиклаш, босқичма-босқич фаоллаштирилади ва бир неча ҳафта ичида барча фойдаланувчиларга етиб бориши кутилмоқда. Ушбу апдейтлар Microsoft'нинг Windows 10'ни ҳамон қўллаб-қувватлаётганини тасдиқлайди. “Замин” янгиликларини “Telegram”да кузатиб боринг