Samsung’дан янги функция: экранда селфи орқали харид таклифлари

Samsung компанияси 2025 йилдан бошлаб Galaxy смартфонлари блокировка экранида селфига асосланган шахсий реклама ва AI-шопинг функциясини жорий этади, деб Rozetked хабар берди. Glance компанияси билан ҳамкорликда ишлаб чиқилган Glance AI функцияси Galaxy S22, S23, S24 ва S25 моделларида ишлайди.

Технология фойдаланувчи селфисини таҳлил қилиб, сунъий интеллект ёрдамида мос кийим-кечак образларини яратади ва харидни бир марта босиш орқали амалга ошириш имконини беради. Функция ихтиёрий равишда ёқилади ва биометрик маълумотлар 12 ой давомида ёки аккаунт ўчирилгунига қадар сақланади.

Glance AI онлайн шопинг платформалари билан интеграция қилинади ва фойдаланувчи хоҳишларига мос маҳсулотларни тавсия қилади. Samsung махфийлик масаласига эътибор қаратган: маълумотлар шифрланади ва фойдаланувчи уларнинг фойдаланилишини назорат қилади.

Glance — 2019 йилда ташкил этилган ҳинд технология компанияси бўлиб, Google ва Samsung билан ҳамкорликда смартфонларнинг блокировка экрани учун шахсий контент ва реклама платформаларини ишлаб чиқади. Хизмат Google I/O 2025 конференциясида ҳам намойиш этилган. «Замин»ни Telegram’да ўқинг!