2026 йил 27 апрель ҳолатига кўра, Россиянинг кирилл алифбосидаги ".рф" миллий доменида рўйхатдан ўтган номлар сони 800 941 тага етди. Йил бошидан буён ушбу домен зонаси 22 039 тага кўпайиб, 2,8 фоизлик ўсишни қайд этди. Бу ҳақда Ixbt.com хабар беради.
Бу ҳақда ".ру" ва ".рф" доменлари Мувофиқлаштириш маркази матбуот хизмати маълумот берди.
Домен зонасининг ривожланиш динамикаси 2025 йилда ҳам барқарор бўлган эди. Ўшанда доменлар сони 2,5 фоизга ошиб, 778 902 тани ташкил этган.
Бир йил давомида 207 654 та янги ном рўйхатга олинган бўлиб, бу 2024 йилдаги кўрсаткичдан сезиларли даражада юқоридир.
Ҳозирда ".рф" доменига 185 та регистратор ва 341 мингдан ортиқ администратор хизмат кўрсатмоқда. Фойдаланувчиларнинг асосий қисмини, яъни 82 фоизини жисмоний шахслар ташкил этади.
Доменларнинг 96,2 фоизи Россия ташкилотлари ва фуқаролари томонидан банд қилинган. Ҳудудлар кесимида Москва, Санкт-Петербург ва Краснодар ўлкаси етакчилик қилмоқда.
Эслатиб ўтамиз, ".рф" домени 2010 йил 12 майда ICANN корпорацияси томонидан Россияга берилган ва дунёдаги биринчи кирилл алифбосидаги домен бўлган эди. 2025 йилдан бошлаб ушбу зонада Россия таркибидаги республикаларнинг 18 та давлат тилидаги 26 та ҳарфни қўллаб-қувватлаш имконияти яратилди.
“Zamin”ни Telegram'да ўқинг!
