АҚШ Вакиллар палатасининг маблағ ажратиш қўмитаси Дональд Трамп маъмуриятининг NASA бюджетини қисқартириш таклифини яна рад этишга тайёрланмоқда. Қонунчилар сўралган 18,8 млрд доллар ўрнига молиялаштиришни ўтган йилдагидек 24,4 млрд доллар даражасида сақлаб қолишни таклиф қилмоқда. Бу ҳақда Ixbt.com хабар беради.
Энг катта келишмовчилик илмий дастурларга тааллуқли: маъмурият уларни молиялаштиришни 3,9 млрд долларгача қисқартиришни таклиф қилган бўлса, қўмита 6 млрд долларни талаб қилмоқда. Шунингдек, космик технологиялардан тортиб операцион фаолиятгача бўлган бошқа моддалар ҳам сезиларли даражада оширилган.
NASA раҳбари Жаред Айзекман иштирокидаги тингловларда бюджет сўрови танқид қилинди. Кичик қўмита раиси Хел Рожерс таклифни «ҳафсалани пир қилувчи» деб атади, конгрессмен Грейс Мен эса қарийб 46 фоизлик қисқартириш туфайли илмий тадқиқотлар учун хавф туғилишини алоҳида таъкидлади.
Алоҳида эътибор Артемис ой дастурига қаратилмоқда, қўмита уни устувор йўналиш деб атайди. Қўшимча баёнотда «америкалик астронавтларнинг Ойга биринчи бўлиб қайтишини таъминлаш» зарурлиги таъкидланган.
Бюджетни тасдиқлаш жараёни энди бошланмоқда: кичик қўмита ҳужжатни 30 апрель куни кўриб чиқади, шундан сўнг у қўмитанинг тўлиқ таркиби муҳокамасига, сўнгра Конгрессга юборилади. Якуний қарор анъанавий равишда палаталар ўртасидаги узоқ музокаралардан сўнг қабул қилинади.
“Zamin”ни Telegram'да ўқинг!
