Россияда маълумотлар марказлари (дата-cентер) учун инфратузилмани барпо этиш жараёнини осонлаштириш режалаштирилмоқда. Янги қоидаларга кўра, ер участкаси эгаларидан қурилиш учун рухсат олиш талаби бекор қилиниши мумкин. Бу ҳақда Ixbt.com хабар беради.
Ҳозирги кунда маълумотлар марказларини ишга туширишда энг катта тўсиқ — бу электр тармоқлари ва алоқа каналларини ўтказишдаги қийинчиликлардир. Ер эгалари ва муҳандислик иншоотлари эгалари кўпинча кабел линияларини ётқизишга рухсат бермай, лойиҳаларни тўхтатиб қўймоқда.
Ҳукумат қошидаги таҳлилий марказ маълумотларига кўра, амалдаги қонунчилик барча ер эгаларининг розилигини олишни талаб қилади. Бу эса жараённи сезиларли даражада секинлаштиради. Муаммони ҳал қилиш учун Фуқаролик кодексига ўзгартиришлар киритиш таклиф этилмоқда.
Хусусан, горизонтал йўналтирилган бурғулаш каби технологиялардан фойдаланилганда, ер юзасига зарар етказилмайди. Бундай ҳолларда ер эгаларидан рухсат олиш ўрнига, уларни шунчаки хабардор қилиш кифоя қилади.
Ушбу ўзгаришлар инфратузилма ривожланишини тезлаштириш ва соҳадаги маъмурий тўсиқларни камайтиришга хизмат қилади. Бу эса Россияда рақамли технологиялар ва сервер қувватларини кенгайтириш учун янги имкониятлар яратади.
“Zamin”ни Telegram'да ўқинг!
