Spotify компанияси пайшанба куни ўзининг интерактив сунъий интеллект (AI) ДЖ функцияси эндиликда яна тўртта янги тилни қўллаб-қувватлашини эълон қилди. Эндиликда фойдаланувчилар француз, немис, италян ва бразилия португал тилларида ҳам мусиқий шарҳларни тинглашлари мумкин. Бунгача ушбу функция фақат инглиз ва испан тилларида мавжуд эди. Бу ҳақда Techcrunch.com хабар беради.
Компания ҳар бир тил учун ўзига хос ном ва характерга эга бўлган янги AI ДЖ образларини тақдим этди: Маиа, Бен, Алех ва Дани. Тил имкониятларининг кенгайиши билан бир қаторда, ушбу функция Австрия, Бразилия, Франция, Германия, Италия, Португалия, Жанубий Корея ва Швейцария каби мамлакатларда ҳам ишга туширилди. Ҳозирда AI ДЖ дунёнинг 75 дан ортиқ мамлакатида фойдаланиш учун очиқ.
Дастлабки босқичда AI ДЖ фақат фойдаланувчиларнинг дидига мос мусиқаларни танлаб, улар ҳақида қисқача маълумот берар эди. Бироқ, 2025-йил май ойида киритилган янгиланишлар билан функция янада интерактивлашди. Эндиликда фойдаланувчилар ChatGPT, Claude ёки Gemini каби сунъий интеллект тизимларига ўхшаб, AI ДЖ билан мулоқот қилиб, кайфият ёки жанр бўйича мусиқий сўровлар юборишлари мумкин.
Spotify ўз иловасига сунъий интеллектга асосланган янги имкониятларни мунтазам равишда қўшиб бормоқда. Хусусан, фойдаланувчилар шунчаки ўзлари хоҳлаган мусиқа ёки подкаст турини таърифлаш орқали махсус плейлистлар яратишлари мумкин бўлди.
“Zamin”ни Telegram'да ўқинг!
