Европа Иттифоқи Осиё ва Европа ўртасидаги интернет алоқасини хавфсизроқ қилиш мақсадида Арктика орқали янги сувости кабелларини ётқизиш имкониятини кўриб чиқмоқда. Ҳозирги кунда глобал трафикнинг қарийб 90 фоизи Яқин Шарқ ва Қизил денгиз ҳудудлари орқали ўтади, бу эса минтақадаги геосиёсий беқарорлик туфайли жиддий хавф туғдирмоқда. Бу ҳақда Ixbt.com хабар беради.
The Verge нашрининг хабар беришича, муҳокама қилинаётган лойиҳалардан бири Polar Коннект деб номланади. У Скандинавиядан Осиёга тўғридан-тўғри Шимолий қутб орқали маълумотлар узатиш каналини яратишни кўзда тутади. Муқобил вариант сифатида Канада қирғоқлари яқинидаги Шимоли-ғарбий ўтиш йўли ҳам кўриб чиқилмоқда.
Янги маршрутларга ўтиш зарурати Қизил денгиздаги тез-тез содир бўлаётган авариялар билан боғлиқ. Хусусан, хусийлар ҳужумлари ва кема лангарларининг кабелларга шикаст етказиши интернет алоқасида узоқ муддатли узилишларга сабаб бўлмоқда. Бундай носозликларни бартараф этиш эса мураккаб халқаро келишувлар ва ойлаб вақт талаб қилади.
Арктика лойиҳасини амалга оширишда техник қийинчиликлар ҳам мавжуд. Музликлар ва айсберглар сувости кабелларига доимий хавф солади, шунингдек, бундай экстремал шароитларда таъмирлаш ишларини олиб борадиган махсус музқорар кемалар етишмайди. Аввалроқ Қуинтиллион лойиҳасида кузатилган носозликлар ҳам ушбу ҳудудда ишлаш қанчалик мураккаб эканлигини кўрсатган эди.
Шунга қарамай, Европа Иттифоқи ушбу инфратузилмани стратегик захира йўли сифатида кўрмоқда. Мутахассислар янги алоқа линияларининг ишга туширилишини 2030-йилга яқин даврга мўлжалламоқда.
“Zamin”ни Telegram'да ўқинг!
