Зарарли дастурларни тадқиқ қилувчи вх-ундергроунд гуруҳи ўз архивларида тахминан 30 терабайт ҳажмдаги зарарли кодлар тўплами мавжудлигини маълум қилди. ВирусТотал асосчиси Бернардо Кинтеро эса ўз хизматларида фойдаланувчилар томонидан тақдим этилган 31 петабайтга яқин зарарли дастур намуналари борлигини таъкидлади. Бу рақамлар киберхавфсизлик компаниялари ва сунъий интеллект тадқиқотчилари учун таҳдидларни таҳлил қилиш ҳамда аниқлаш моделларини ўқитишда ўта муҳим аҳамиятга эга. Бу ҳақда Techcrunch.com хабар беради.
Ушбу улкан маълумотлар базасини тасаввур қилиш учун уларни 1 терабайтлик стандарт 3,5 дюймли қаттиқ дискларда (ҲДД) сақланган деб фараз қилиб кўрамиз. Ҳар бир дискнинг қалинлиги тахминан 1 дюймни ташкил этади. Агар вх-ундергроунднинг 30 терабайтлик маълумотларини шу тарзда устма-уст тахласак, миноранинг баландлиги атиги 30 дюйм ёки 76 сантиметрга етади.
ВирусТоталдаги 31 петабайтлик маълумотлар ҳажми эса анча ҳайратланарли. Бу ҳажмни сақлаш учун 31 744 та қаттиқ диск талаб этилади. Уларни бирин-кетин устма-уст тахлаб чиқилса, умумий баландлик 2645 футга (тахминан 806 метр) етади. Бу кўрсаткич дунёдаги энг баланд бино — Бурж Халифадан ҳам баландроқ бўлиб, маълумотлар дунёси қанчалик кенгайиб бораётганини яққол кўрсатиб беради.
“Zamin”ни Telegram'да ўқинг!
