Apple компанияси Фортните яратувчиси Эпик Гамес билан давом этаётган суд жараёнида навбатдаги тактикани қўллади. iPhone ишлаб чиқарувчиси App Store комиссиялари бўйича чиқарилган суд қарори барча дастурчиларга, жумладан, ушбу даъвога алоқадор бўлмаган Microsoft ва Spotify каби гигантларга ҳам татбиқ этилмаслиги кераклигини таъкидламоқда. Бу ҳақда Techcrunch.com хабар беради.
Apple АҚШ Олий судига топширган аризасида Эпик Гамес жамоавий даъво билан чиқмаганини ва барча дастурчилар учун чекловларни бекор қилиш Эпик учун қандайдир енгиллик беришини исботламаганини қайд этган. Компания қуйи инстанция судининг қарорини қайта кўриб чиқишни сўрамоқда.
Низонинг асосий нуқтаси дастурчиларга ўз иловаларида муқобил тўлов тизимларига ҳаволалар жойлаштириш ҳуқуқини бериш билан боғлиқ. Apple бундай ҳаволаларга рухсат берган бўлса-да, ташқи тўловлардан 27 фоиз миқдорида комиссия ундиришни бошлади. Тўққизинчи округ суди буни суд қарорини менсимаслик деб баҳолади, чунки бундай юқори ҳақ ташқи тўловлардан фойдаланиш мақсадини йўққа чиқаради.
Apple ўз позициясини ҳимоя қилар экан, суд қарорида комиссиялар ҳақида аниқ тақиқ бўлмаганини, шунинг учун техник жиҳатдан ҳеч қандай қонунбузарлик содир этилмаганини даъво қилмоқда. Эпик Гамес эса Apple'нинг бу ҳаракатини истеъмолчилар фойдасига хизмат қиладиган тўлов рақобатини кечиктиришга уриниш деб атади.
Шунга қарамай, Эпик Гамес яқинда Фортните ўйинини бутун дунё бўйлаб (Австралиядан ташқари) App Store платформасига қайтарди. Компания суд якунда Apple'нинг ҳозирги тўлов тизимини ўзгартиришига ишонч билдирмоқда.
“Zamin”ни Telegram'да ўқинг!
