SpaceXдан “учар ликопча”: Старфалл лойиҳасининг илк тафсилотлари маълум бўлди

АҚШ Федерал авиация бошқармаси (ФАА) SpaceX компанияси томонидан ишлаб чиқилаётган махфий Старфалл лойиҳасига оид янги тафсилотларни очиқлади. Бу лойиҳа орбитадан юкларни Ерга қайтаришга мўлжалланган кўп марта ишлатиладиган космик капсулани ўз ичига олади. Келажакда бундай аппаратлар коинотда тажрибалар ўтказиш, материаллар ишлаб чиқариш ва сайёрамизнинг турли нуқталари ўртасида тезкор юк етказиб бериш учун хизмат қилиши кутилмоқда. Бу ҳақда Ixbt.com хабар беради.

ФАА томонидан эълон қилинган ҳужжатларга кўра, Старфалл — бу диск шаклидаги учувчисиз капсула бўлиб, у ташқи кўринишидан учар ликопчани эслатади. Уни Falcon 9 ва Starship ракеталари ёрдамида коинотга учириш режалаштирилган. Орбитага чиққандан сўнг, аппарат микрогравитация шароитида илмий ва ишлаб чиқариш вазифаларини бажаради, сўнгра фойдали юк билан бирга Ерга қайтиб тушади.

SpaceX ушбу лойиҳани серияли қайтариладиган аппаратлар оиласининг асоси сифатида кўрмоқда. Тахминларга кўра, битта капсула орбитага 1 тоннагача юк етказиб бериш ва уни қайтариб олиб тушиш имкониятига эга бўлади. Бу тизим коинот саноатини ривожлантиришда, хусусан, айрим бутловчи қисмларни бевосита коинотда ишлаб чиқаришда муҳим рол ўйнайди.

Дастлабки синовлар Тинч океани узра, Калифорния ва Мексика қирғоқларидан тахминан 1300 километр узоқликда ўтказилиши режалаштирилган. Атмосферага киргандан сўнг, капсула парашютлар ёрдамида тормозланади ва океанга қўнади. SpaceX аппаратнинг барча қисмларини махсус кемалар ёрдамида йиғиб олиб, таҳлил қилишни ва улардан қайта фойдаланишни мақсад қилган.

Агар лойиҳа муваффақиятли амалга ошса, SpaceX Варда Спасе Индустриес, Инверсион ва Атмос Спасе Карго каби компаниялар фаолият юритаётган қайтариладиган орбитал платформалар бозорида етакчиликни қўлга киритиши мумкин. Ҳозирда ушбу стартапларнинг барчаси коинотда маҳсулот ишлаб чиқариш ва натижаларни Ерга етказиб бериш технологиялари устида иш олиб бормоқда.