Rossiya avtomobil bozorida ko'pchilikka yaxshi tanish bo'lgan Chevrolet Captiva krossoveri yana paydo bo'ldi. 2006 yildan 2015 yilgacha rasman sotilgan ushbu model endilikda Birlashgan Arab Amirliklaridan import qilinmoqda. Avtomobil ham besh, ham yetti o'rindiqli variantlarda xaridorlarga taklif etilmoqda. Bu haqda avtonovostidnya.ru xabar beradi.
Yangi Captiva narxi 2 150 000 rubldan boshlanadi. Bu ko'rsatkich uni xuddi shu sinfdagi Xitoy avtomobillariga nisbatan ancha hamyonbop qiladi. Masalan, Chery Tiggo 8 Pro Max, Geely Okavango yoki GAC GS8 kabi modellarni sotib olish uchun xaridorlar 3 300 000 rubldan ortiq mablag' sarflashlariga to'g'ri keladi.
Texnik jihatdan krossover 147 ot kuchiga ega 1,5 litrli benzinli turbomotor va variator uzatmalar qutisi bilan jihozlangan. Barcha modellar faqat oldingi uzatmali tizimga ega. Komplektatsiyasiga qarab, avtomobil charm salon, LED optika, iqlim nazorati, kruiz nazorati, 360 darajali ko'rinish tizimi va boshqa qulayliklar bilan ta'minlangan.
Hozirgi kunda Rossiyaning turli shaharlarida ushbu modelni buyurtma asosida yoki tayyor holda xarid qilish imkoniyati mavjud. Narxlar yetkazib berish va bojxona rasmiylashtiruvi xarajatlariga qarab 2 790 000 rublgacha yetishi mumkin. Mutaxassislarning fikricha, Captiva o'zining amaliyligi va oilaviy avtomobil sifatidagi qulayligi bilan xaridorlar e'tiborini tortishda davom etadi.
“Zamin”ni Telegramʻda oʻqing!
