Xiaomi kompaniyasi o‘zining navbatdagi yirik loyihasi — Kunlun nomli to‘liq o‘lchamli krossoverini yo‘l sinovlariga chiqardi. Xitoyda kamuflyaj ostida payqalgan ushbu model bozorga Xiaomi YU9 nomi bilan kirib kelishi kutilmoqda. Bu haqda Ixbt.com xabar beradi.
Yangi avtomobil uch qatorli o‘rindiqlar tizimiga ega bo‘lib, yetti kishiga mo‘ljallangan. Shpionlik suratlarga ko‘ra, krossover yopiq old qism, o‘tkir chiziqli optika, tom qismiga o‘rnatilgan LiDAR datchigi, yashirin eshik tutqichlari va yirik g‘ildirak arkalari bilan ajralib turadi. Mashinaning uzunligi taxminan 5,2 metrni tashkil etadi.
Texnik jihatdan model EREV gibrid tizimi bilan jihozlanadi. U 70 kVt·soatdan ortiq quvvatga ega akkumulyator yordamida faqat elektr energiyasida 400 kilometrdan ko‘proq masofani bosib o‘tish imkoniyatiga ega bo‘ladi.
Eslatib o‘tamiz, Xiaomi kompaniyasining avtomobil bozoridagi ilk muvaffaqiyati bo‘lgan Xiaomi SU7 modeli katta qiziqish uyg‘otmoqda. Sotuvlar boshlanganidan keyingi 48 kun ichida ushbu elektromobilga berilgan tasdiqlangan buyurtmalar soni 80 mingdan oshib ketdi.
“Zamin”ni Telegramʻda oʻqing!
