Putin musulmonlarni Qurbon hayiti bilan tabrikladi

Rossiya prezidenti Vladimir Putin rossiyalik musulmonlarni Qurbon hayiti bilan tabriklab, Rossiya musulmon jamoasi mamlakat hayotida faol ishtirok etayotganini ta’kidladi, deb xabar berdi Kreml matbuot xizmati.

“Vladimir Putin Rossiya musulmonlarini Qurbon hayiti bilan tabrikladi... Rossiya musulmon jamoatchiligi mamlakat hayotida faol ishtirok etayotgani, keng ko‘lamli xayriya, ma’rifiy tashabbuslarni amalga oshirish, yosh avlodni ajdodlar an’ana va urf-odatlariga hurmat bilan tarbiyalashga tinimsiz e’tibor qaratayotgani quvonarlidir”, — deyiladi xabarda.

Prezident jamiyatda millatlararo tinchlik va totuvlikni saqlashda musulmonlar jamiyati faoliyati g‘oyat muhim ekanini ta’kidladi.

“Qadimiy islom ziyoratgohlariga ziyorat tugashi munosabati bilan Qurbon hayiti chuqur axloqiy va ma’naviy ma’noga ega bo‘lib, odamlarni birlashtirishga, muhabbat, mehr va rahm-shafqat kabi mustahkam qadriyatlarni saqlashga xizmat qiladi”, — deya qo‘shimcha qildi Putin.

Prezident musulmonlarga sihat-salomatlik, muvaffaqiyat, baxt va farovonlik tiladi. “Zamin” yangiliklarini “Instagram”da kuzatib boring