Rossiya: «Pashinyanning iltimosi uchun Qoraboqqa qo‘shin kiritolmaymiz»

Kreml matbuot kotibi Dmitriy Peskov, poytaxt Moskvada Ozarbayjon nodavlat tashkilotlarining (NNT) Lochin koridoridagi namoyishi bilan bog‘liq jurnalistlarning savollariga javob berdi.

Peskov Rossiyaning tomonlar o‘rtasida vositachilik qilish harakatlarini davom ettirishini qayd etdi.

“Rossiya prezidenti Vladimir Putin Armaniston bosh vaziri Pashinyan bilan Sankt-Peterburgdagi uchrashuvida Lochin koridoridagi o‘zgarishlar bo‘yicha batafsil maslahatlashdi. Putin va Pashinyanning bu boradagi aloqalari davom etadi”, dedi.

Peskov Moskva Lochin koridorida kuchayib borayotgan keskinlikdan xavotirda ekanini ma’lum qildi.

"Haqiqatan ham ortib borayotgan taranglikdan xavotirdamiz, ham Yerevan, ham Boku bilan uch tomonlama kelishuvlar doirasida ish va sa’y-harakatlarimizni davom ettiramiz", dedi.

U Pashinyanning Qoraboqqa xalqaro tinchlikparvar kuchlar yuborilishi haqidagi iltimosi haqida ham to‘xtaldi.

“Agar mojaroning har ikki tomoni rozi bo‘lsa, xalqaro tinchlikparvar kuchlar jalb etilishi mumkin va bu holatda nafaqat Armaniston, balki Ozarbayjonning ham roziligi talab qilinadi. Armaniston bizning eng yaqin ittifoqchilarimizdan biri va Ozarbayjon bizning qimmatli hamkorimizdir”, dedi u.

Ozarbayjon faollarning Lochin koridorida namoyishi

Ozarbayjon hukumati asosan arman millati istiqomat qilayotgan va Rossiya kuchlari vaqtincha joylashtirilgan hududdagi yer osti boyliklarining noqonuniy tashib ketilishi va buning natijasida atrof-muhitga yetkazilgan zararni tekshirish maqsadida 10 dekabr kuni mintaqaga ekspert guruhlarini yuborgan edi.

Bu vaziyatdan kelib chiqqan holda Ozarbayjon atrof-muhit nodavlat tashkilotlari a’zolari va faollari 12 dekabr kuni Ozarbayjonda konlarning noqonuniy ishlashiga yo‘l qo‘ymaslik talabi bilan Lochin koridorida norozilik namoyishi boshladi.

Armaniston rasmiylarining tinch aholini Lochin yo‘lagidan o‘tishiga ruxsat berilmagani haqidagi iddaolari Ozarbayjon Tashqi ishlar vazirligi tomonidan rad etildi. Vazirlik yo‘l Rossiya kuchlarining noqonuniy harakatlari uchun yopilganini va fuqarolarga hech qanday to‘siqlar yo‘qligini bildirdi. “Zamin”ni Telegramʻda oʻqing!