Foto: Global Look Press
Harbiy ro‘yxatga olish komissarliklari chaqiruv qog‘ozi yuborayotgan Rossiya hududlari ro‘yxatini huquq himoyachisi Pavel Chikov e’lon qilib, safarbarlikning ikkinchi to‘lqini haqida hozircha gap yo‘qligini ta’kidladi.
Rossiyaning kamida 35 ta hududi chaqiruv qog‘ozlari tarqatilishi va harbiy tayyorgarlik boshlangani haqida 15 mart, chorshanba kuni ma’lum qildi, dedi «Agora» inson huquqlari tashkiloti rahbari Pavel Chikov o‘zining Telegram-kanalida. Unga ko‘ra, Rossiya fuqarolari harbiy ro‘yxatga olish idorasiga «ma’lumotlarini yangilash» yoki harbiy tayyorgarlikdan o‘tish uchun chaqirilyapti.
«Bu hali safarbarlikning ikkinchi to‘lqini emas», deb ta’kidlaydi Chikov o‘z postida ochiq manbalardan olingan ma’lumotlarga, masalan, Tyumen viloyati hukumati bayonotiga, shuningdek, mintaqaviy ommaviy axborot vositalari va internet nashrlari xabariga tayanib.
Chikovning so‘zlariga ko‘ra, hozirda quyidagi hududlarda (alifbo tartibida) chaqiruv qog‘ozlari yuborilmoqda: Oltoy o‘lkasi, Arxangelsk viloyati, Belgorod viloyati, Vladimir viloyati, Voronej viloyati, Yahudiylar avtonom viloyati, Kaluga viloyati, Kabarda–Bolqoriya Respublikasi, Krasnodar o‘lkasi, Krasnoyarsk o‘lkasi, Leningrad viloyati, Lipetsk viloyati, Moskva, Moskva viloyati, Murmansk viloyati, Nijniy Novgorod viloyati, Omsk viloyati, Penza viloyati, Perm o‘lkasi, Boshqirdiston Respublikasi, Dog‘iston Respublikasi, Komi Respublikasi, Mari El Respublikasi, Tatariston Respublikasi, Sankt-Peterburg, Saratov viloyati, Sverdlovsk viloyati, Tambov viloyati, Tver viloyati, Tyumen viloyati, Ulyanovsk viloyati, Xanti-mansilar muxtor okrugi, Chelyabinsk viloyati, Chuvashiston va Yamal nenetslari muxtor okrugi.
Huquq himoyachisi ta’kidlaganidek, «ko‘p savollarga harbiy tayyorgarlikka chaqiruv qog‘ozlari sabab bo‘ladi, bu faqat prezident qaroridan keyin o‘tkazilishi mumkin», biroq bunday farmon bo‘lmagan yoki e’lon qilinmagan. Shu munosabat bilan, harbiy tayyorgarlik uchun zaxiraga chaqirish noqonuniy hisoblanadi, deb yozadi Chikov, agar chaqiruv qog‘ozi olsangiz, «Agora» ishonch telefoniga murojaat qilishni tavsiya etib.
O‘z navbatida, «Novaya gazeta Yevropa» nashri o‘z muxbirining Moskvadagi pochta qutisiga kelib tushgan chaqiruv qog‘ozi skanerini tasdiqlagan holda, chaqiruv qog‘ozlari haqiqatan ham topshirilayotganini tasdiqladi.
2022 yil 21 sentyabrda Rossiya prezidenti Vladimir Putin «qisman safarbarlik»ni e’lon qildi. Ukraina bilan urushda qatnashish uchun fuqarolarning faqat ma’lum toifalari chaqirilishi aytilgan edi, ammo keyingi voqealar safarbarlik juda katta ko‘lamda o‘tganini ko‘rsatdi.
2023 yil yanvar oyida Pskov viloyat yig‘ilishi deputati Artur Gaydukning so‘roviga javoban, Rossiya prezidentining Fuqarolar murojaatlari bilan ishlash boshqarmasi Putinning Rossiyada «qisman safarbarlik» to‘g‘risidagi farmoni davom etayotgani haqida xabar berdi.
Germaniya Federal razvedka xizmati fevral oyida xabar qilganidek, 2022 yil kuzida Rossiyada 300 mingga yaqin odam safarbar qilingan, ularning ba’zilari hali ham tayyorgarlikdan o‘tmoqda, ba’zilari allaqachon jang maydoniga yuborilgan. Federal razvedka xizmati rahbari Bruno Kal so‘zlariga ko‘ra, «Rossiyaning keyingi safarbarlik salohiyati, agar Kreml buni zarur deb hisoblasa, million kishigacha bo‘lgan zaxirani tashkil qiladi».
21 fevral kuni Ukraina Mudofaa vazirligi Bosh razvedka boshqarmasi Rossiyada safarbarlikning yangi to‘lqini doirasida ommaviy ravishda universitetlarning kunduzgi bo‘limlari talabalari frontga yuborilishi mumkinligini ma’lum qildi.
1 aprel kuni Rossiyada harbiy xizmatga bahorgi chaqiruv rasman boshlanadi.
“Zamin” yangiliklarini “Telegram”da kuzatib boring
