Afrikadan O‘zbekistonga olib kelinayotgan bananlar orasida 50 kilo kokain topildi

^{Foto: Rossiya Federal bojxona xizmati}

Afrikadan O‘zbekistonga olib ketilayotgan bananlar orasidan 50 kilo kokain topildi. Yuk belgilangan manzilga yetib bormagan: Sankt-Peterburg portida bojxonachilar tomonidan to‘xtatib qolingan.

Rossiya Federal bojxona xizmatining ma’lum qilishicha, narkotik moddalar “Gavan” bojxona postiga kelgan o‘nlab refrijeratorli (sovitkichli) konteynerlarning biridan topilgan. Konteyner skaner qilinganda inspektor monitorda sovitish moslamasining yashirin bo‘shlig‘ida yot buyumlar yashirilganini ko‘rgan.

Tekshiruv natijasida plyonkaga qadoqlangan oq kukunli 50 dona briket topilgan. Ekspertiza natijalariga ko‘ra, u kokain ekanligi aniqlangan.

^{Foto: Rossiya Federal bojxona xizmati}

Hujjatlarga ko‘ra, yuk Afrika davlatlaridan Yevropa orqali O‘zbekistonga turli dengiz kemalarida tranzit orqali olib ketilayotgan bo‘lgan.

Holat yuzasidan Rossiya Jinoyat kodeksining 229-1-moddasi (narkotik moddalar kontrabandasi) bilan jinoyat ishi qo‘zg‘atilgan.