15:26 / 13.11.2024

Bokuda Shavkat Mirziyoyev va Ilhom Aliyev uchrashuv o‘tkazdi

^{Foto: Prezident matbuot xizmati}
Boku shahriga amaliy tashrif doirasida 13 noyabr kuni Shavkat Mirziyoyev Ilhom Aliyev bilan uchrashuv o‘tkazdi.

Prezident matbuot xizmatining xabar qilishicha, suhbat avvalida davlat rahbari Ozarbayjon yetakchisini BMTning Iqlim bo‘yicha sammiti (COP29) muvaffaqiyatli tashkil etilgani bilan tabrikladi.

2024 yil avgust oyida oliy darajada erishilgan kelishuvlar doirasida O‘zbekiston—Ozarbayjon do‘stlik va ittifoqchilik munosabatlarini yanada kengaytirishning dolzarb masalalari ko‘rib chiqildi. Ikki mamlakat o‘rtasidagi ko‘p qirrali munosabatlarni jadal rivojlantirish yilida hamkorlik yuksak darajaga yetgani mamnuniyat bilan qayd etildi.

^{Foto: Prezident matbuot xizmati}
Tovar ayirboshlash hajmi oshmoqda, avtomobilsozlik, to‘qimachilik, elektrotexnika, qishloq xo‘jaligi, qurilish va shaharsozlik hamda boshqa yo‘nalishlarda kooperatsiya loyihalari muvaffaqiyatli amalga oshirilmoqda. Loyihalar portfelini, shu jumladan qo‘shma investitsiya kompaniyasi mablag‘larini jalb etgan holda yanada kengaytirish muhimligi ta’kidlandi.

Afg‘onistonning iqtisodiy rivojlanishiga ko‘maklashishga qaratilgan amaliy hamkorlikni kengaytirish masalalari ham muhokama qilindi.

Faol madaniy-gumanitar va hududlararo almashinuvni davom ettirish, shuningdek, 2025 yilda diplomatik munosabatlar o‘rnatilganining 30 yilligini nishonlash doirasida keng qamrovli tadbirlar dasturini tayyorlashga alohida e’tibor qaratildi.