Aktyor Leonardo Di Kaprio ikkiyuzlamachilikda ayblanmoqda

^{Foto: Getty Images}
Aktyor Leonardo Di Kaprio va uning qalligʻi Vittoria Cheretti xususiy samolyotda Meksikaga etib kelganida aeroportda paparastsiga tushib qoldi. Bu haqda “Kino.mail.ru”ga tayanib Daryo xabar bermoqda.

Meksika aeroportida Di Kaprio va Cherettidan tashqari aktyorning otasi Jorj va uning ayoli boʻlgan. Aktyor oʻsha kun koʻzga tashlanmaydigan sport kiyimida va qora koʻzoynakda boʻlgan.

Joriy yil 7 yanvar kuni Los Anjelesda boshlangan oʻrmon yongʻinlari jiddiy talafotlarga olib kelayotgan hamda 100 mingdan ortiq aholini evakuatsiya qilishga majbur boʻlgan vaqtda Di Kaprio AQShni tark etishga qaror qilgan va Meksikaning Kabo San Lukas shahriga yaqinlari bilan uchib ketgan.

^{Foto: Daily Mail}
“Leoning ekologiyaga qoʻshgan hissasi va harakatlarini e'tiborga oladigan boʻlsak, bunday yirik tabiiy ofat paytida uning shaxsiy samolyotdan foydalanishi hayratlanarlidir”, deyiladi xabarda.

Ma'lumot uchun, 1998 yilda “Titanik” filmini suratga olish ishlari tugaganidan soʻng, Leonardo Di Kaprio iqlimga oid ekologik falokatlarning oldini olish masalalari bilan shugʻullanadigan mutaxassislarni jalb qilgan va oʻzining Global Green fondini tashkil qilgan. Jamgʻarma yovvoyi tabiat, dengiz flora va faunasi hamda qoʻriqlanadigan erlardagi mahalliy aholi huquqlarini himoya qilish boʻyicha loyihalarni moliyalashtiradi.

^{Foto: Daily Mail}
2021 yilda rebrendingdan soʻng jamgʻarma Re:wild degan nomga oʻzgartirilgan va Global Wildlife Conservation bilan birlashgan. Re:wild 50 ta davlatda faoliyat yuritadi, 120 ga yaqin turli loyihalarni qoʻllab-quvvatlaydi va 60 dan ortiq kompaniyalar bilan hamkorlik qiladi. Shuningdek, 2022 yilda Di Kaprio xalqaro iqlim fondiga 45 million dollar mablagʻ ajratgan.

Shuningdek, aktyor 20 yildan ortiq vaqt davomida 200 dan ortiq turli xil ekologik loyihalarni moliyalashtirgan, iqlim oʻzgarishi va global issiqlikka qarshi kurashish uchun 80 million dollardan ortiq grant ajratgan.

Daily Mail nashri qayd etishicha, amerikalik aktyor va stsenariy muallifi Larri Devid ham Meksikaga taxminan oʻsha vaqtda etib kelgan. “Zamin” yangiliklarini “Telegram”da kuzatib boring