Rossiya maxsus xizmatlari prezident Vladimir Putinning xavfsizligini ta'minlash uchun barcha kerakli choralarni koʻrmoqda. Bu haqda Rossiya prezidentining matbuot kotibi Dmitriy Peskov amerikalik jurnalist Taker Karlsonning shov-shuvli bayonotiga javoban gapirgan.
«Rossiya maxsus xizmatlari jamoat xavfsizligini ta'minlash va albatta davlat qoʻriqlovidagi shaxslar, birinchi navbatda davlat rahbari daxlsizligi yoʻlida barcha kerakli choralarni koʻrmoqda», – degan D.Peskov.
Gap shundaki, amerikalik taniqli jurnalist Taker Karlson kuni kecha boshqa bir amerikalik jurnalist, siyosiy sharhlovchi Mettyu Taybbi bilan suhbatda sobiq prezident Jo Bayden ma'muriyati Putinga qarshi suiqasd uyushtirishga uringani haqida gapirgan. U Putinni oʻldirishga urinishni «aqlsizlik» deb atagan.
Ziddiyatli shaxs deb koʻriladigan Karlson ushbu iddaosini tasdiqlovchi biror dalil keltirmagan. U, shuningdek, sobiq davlat kotibi Entoni Blinken AQSh va Rossiya oʻrtasida urush chiqarishga uringanidan bahs etgan.
Amerikalik jurnalist Taker Karlson 2024 yil fevral oyida Putin bilan katta intervyu uyushtirgan edi. Putin Karlson bergan minbardan foydalanib, yana Ukraina va Gʻarbni harbiy mojaroni boshlaganlikda ayblagandi.
Putinga qarshi suiqasdga urinishlar haqida avval ham xabarlar tarqalgan. Masalan, 2022 yilda Buyuk Britaniyaning Sun nashri shu mazmunda xabar chop qilgan, ammo Kreml uni rad etgan edi.
2023 yil may oyida Ukrainaga tegishli dronlar Kremlga qadar uchib kelgani esa Putinga suiqasd va terakt deya baholangani ma'lum. “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
