Rossiya Mudofaa vazirligi: Ukraina Kursk viloyatida hujum uyushtirishga urindi

Rossiya Mudofaa vazirligi 6 fevral ertalab Ukraina Qurolli kuchlari Kursk viloyati hududida keng koʻlamli hujum uyushtirishga harakat qilganini ma'lum qildi.

Vazirlikning bayonotiga koʻra, Ukraina armiyasi Cherkasskaya Konopelka va Ulanok aholi punktlari yoʻnalishida aksil-hujum uyushtirishga uringan. Hujumda zirhli texnikaga ega ikkita mexanizatsiyalashgan batalon ishtirok etgan.

Janglar va yoʻqotishlar haqida ma'lumotlar

Hujum qilingan hududlar Sudja shahri yaqinida joylashgan boʻlib, u hozirda Ukraina Qurolli kuchlari nazoratida boʻlgan tuman markazi hisoblanadi.

Rossiya mudofaa idorasi ushbu yoʻnalishda Ukraina armiyasi katta yoʻqotishlarga uchraganini bildirmoqda.

Hali rasmiy tasdiq yoʻq

Bungacha bir qator Z-kanallar va Rossiya harbiy muxbirlari Kursk viloyati hududida shiddatli janglar kechayotgani haqida xabar bergan. Ularga koʻra, Sudjaning janubi-sharqida keskin toʻqnashuvlar kuzatilmoqda.

Hozircha Ukraina rasmiylari Kursk viloyatidagi ushbu mojaro boʻyicha izoh bermagan. “Zamin” yangiliklarini “Telegram”da kuzatib boring