Eron oliy rahbari Ali Xomanaiy AQSH va qudratli davlatlar tomonidan taklif etilayotgan muzokaralarni keskin rad etdi. Uning fikricha, bu kabi muzokaralar haqiqiy muammolarni hal qilish uchun emas, balki siyosiy hukmronlik va bosim o‘tkazish maqsadida taklif qilinmoqda.
«Ayrim qudratli davlatlarning muzokara takliflari muammolarni hal qilish uchun emas, balki hukmronlik qilish va o‘z manfaatlarini ro‘yobga chiqarishga qaratilgan. Eron ularning umidlarini albatta qabul qilmaydi», — dedi Xomanaiy.
Eron AQSHning muzokara taklifini rad etdi
So‘nggi kunlarda AQSH prezidenti Donald Tramp Eron rahbariyatiga maktub yo‘llagani va mamlakatning yadroviy dasturi bilan bog‘liq xavotirlar yuzasidan muzokaralar o‘tkazishni taklif qilgani haqida xabarlar tarqalgan edi.
Biroq, Eronning BMTdagi vakolatxonasi hech qanday maktub qabul qilinmaganini ma’lum qildi. Tehron muzokaralar o‘tkazish ehtimolini ham rad etdi.
Yadroviy bitim va Yevropa bilan munosabatlar
Xomanaiy nutqida Yevropa davlatlarini ham tanqid qildi. Uning so‘zlariga ko‘ra, Yevropa Eronning yadroviy kelishuv bo‘yicha majburiyatlarini bajarmagani haqida gapirmoqda, lekin o‘zlari bu bitimni amalga oshirish uchun harakat qilmagan.
«Siz Eron o‘z majburiyatlarini bajarmaganini da’vo qilasiz. Xo‘sh, o‘zingiz bu majburiyatlarni bajardingizmi? Siz birinchi kundanoq beharakatsiz», — dedi Eron oliy rahbari.
Shuningdek, Xomanaiy AQSH birinchi bo‘lib yadroviy kelishuvdan chiqqanini va Yevropaning bu bo‘yicha hech qanday real chora ko‘rmaganini ta’kidladi.
Trampning munosabati va Erondagi siyosiy qarama-qarshilik
Tramp o‘tgan oy Eron bilan yangi yadroviy kelishuvga erishish imkoniyati borligini bildirgan. U Eronni «bombardimon qilmasdan» kelishuvga erishmoqchi ekanligini aytgan.
7 mart kuni Tramp «Eron bilan munosabatlarda qiziq vaqtlar yaqinlashyapti» deb ta’kidladi.
Shu bilan birga, Eron prezidenti Mas’ud Pizishkiyon AQSH bilan muzokaralar o‘tkazish zarurligini bildirgan edi. Biroq, Ali Xomanaiy bunga qarshi chiqdi va mamlakat pozitsiyasi qat’iy ekanini ma’lum qildi.
Bu hodisa Erondagi ichki siyosiy ziddiyatlarni ham ko‘rsatib turibdi – bir taraf muzokaralar tarafdori bo‘lsa, oliy rahbarlik bunga yo‘l qo‘ymayapti.
Yaqin vaqtlarda AQSH va Eron munosabatlarida jiddiy keskinlik yuzaga kelishi ehtimoli oshmoqda.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
