Rossiyada yana bir sobiq vazir “chet el agenti” deb e’lon qilindi

Rossiya Adliya vazirligi sobiq tashqi ishlar vaziri Andrey Kozirevni “chet el agenti”lar ro‘yxatiga kiritdi. Bu haqda rasmiy manbalar xabar berdi.

Birinchi vazir — chet el agenti
Kozirev Rossiyaning yangi tarixidagi birinchi tashqi ishlar vaziri bo‘lgan. U 1990 yildan 1996 yilgacha ushbu lavozimda faoliyat yuritgan. Shuningdek, Davlat Dumasining 1- va 2-chaqiriq deputatlaridan biri bo‘lgan.

Aslida u nima bilan ayblanmoqda?
Adliya vazirligi Kozirevni:

• Rossiya hukumati siyosatini tanqid qilgani,
  
• Rossiya armiyasi haqida “feyk” tarqatgani,
  
• Ukrainaga bostirib kirishga qarshi chiqqanligi,
  
• hamda chet el maydonchalari bilan hamkorlik qilgani uchun “chet el agenti” deb topgan.
  

Amerikada yashaydi, Ukrainadagi urushni qoralagan
Kozirev 2012 yildan beri AQSHda yashab kelmoqda. U Rossiyaning Ukrainaga bostirib kirishini keskin tanqid qilgan va rasmiy pozitsiyaga qarshi chiqishlar bilan tanilgan.

“Chet el agenti” bo‘lish nima degani?
Rossiya qonunchiligiga ko‘ra, “chet el agenti” deb tan olinganlar:

• faoliyati va moliyaviy xarajatlari haqida Adliya vazirligiga hisobot topshiradi;
  
• har bir chiqishida (maqola, ijtimoiy tarmoq va boshqalarda) shu maqomni alohida belgilab qo‘yishi shart.
  

2022 yildan buyon reyestr yuritila boshlangan va unda mingga yaqin shaxs va tashkilotlar mavjud.

Siz nima deb o‘ylaysiz – “chet el agenti” degan maqom qay darajada adolatli va shaffof? “Zamin”ni Telegramʻda oʻqing!