Zelenskiy: “Shahed”larga qarshi 20 ming raketa kerak edi, ular esa Yaqin Sharqqa ketdi

Ukraina prezidenti Volodimir Zelenskiy ABC News'ga bergan intervyusida mamlakat xavfsizligi uchun o‘ta muhim bo‘lgan bir qaror haqida ochiq bayonot berdi. Uning so‘zlariga ko‘ra, Ukraina tomoni «Shahed» dronlariga qarshi kurashish uchun AQSHdan 20 mingta raketa olishga umid qilgan, ammo bu raketalar boshqa yo‘nalish — Yaqin Sharqqa yuborilgan.

“Bizda «Shahed» turkumidagi dronlar bilan juda katta muammo bor. Ular hujumchi, aniq va xavfli. Biz har kuni ularga qarshi kurashyapmiz, lekin samarali kurashish uchun texnologik ustunlik talab etiladi. Bizda esa shunday imkoniyat bor edi — AQSH tomonidan 20 mingta raketa yetkazilishi kerak edi,” — dedi Zelenskiy.

Uning ta’kidlashicha, ushbu raketalarni topshirish bo‘yicha qaror Jo Bayden ma’muriyati tomonidan qabul qilingan va Mudofaa vaziri Lloyd Ostin ham ushbu rejaga hamkorlik qilgan. Ukraina bu loyihani o‘z mudofaa strategiyasining asosiy qismi sifatida ko‘rgan.

Biroq Zelenskiy erta tongda Ukraina mudofaa vaziridan olgan ma’lumotni ochiqlab, AQSH ushbu raketalarni Yaqin Sharqqa yo‘naltirganini ma’lum qildi. “Bu biz uchun nafaqat hayratlanarli, balki juda xavfli ssenariy,” — dedi u.

Eslatib o‘tamiz, Eronda ishlab chiqarilgan “Shahed” dronlari Rossiyaning Ukrainaga qarshi urushida yangi strategik qurol sifatida namoyon bo‘lgan. Ular 2000 kilometr masofagacha uchish qobiliyatiga ega, aniq nishonni zarbaga oladi va yuqoridagi portlovchi yuk bilan kuchli ta’sir ko‘rsatadi. Uning asosiy muammosi — baland tovush bilan harakatlanishi, shu bois ukrainaliklar orasida u “moped” laqabini olgan.

Ukraina rasmiylarining fikricha, mazkur raketalar “Shahed” dronlarini samarali ravishda yo‘q qilish va mamlakat xavfsizligini ta’minlashda hal qiluvchi rol o‘ynashi mumkin edi.

Hozirda ushbu masala xalqaro darajada qizg‘in muhokama qilinyapti. Zelenskiy Qo‘shma Shtatlardan rasmiy tushuntirish kutayotganini ta’kidladi. “Zamin”ni Telegramʻda oʻqing!