Britaniyada ayol TikTok deb kompaniyaning 500 ming dollarini talon-toroj qildi

Buyuk Britaniyada TikTok ijtimoiy tarmog‘iga chuqur bog‘lanib qolgan ayolning sarguzashtlari butun mamlakat bo‘ylab katta shov-shuvga sabab bo‘ldi. Daily Mail nashrining yozishicha, Ketrin Grinoll ismli britaniyalik xotin New Reg Ltd avtomobil kompaniyasida hisobchi bo‘lib ishlagan vaqtda ish joyining moliyaviy tizimlaridan foydalanib, umumiy qiymati 500 ming dollarga yaqin mablag‘ni o‘g‘irlashga muvaffaq bo‘lgan.

Tekshiruvlar jarayonida aniqlanishicha, Grinoll jami 121 ta noqonuniy tranzaksiya amalga oshirgan va bu orqali katta miqdordagi mablag‘ni shaxsiy hisob raqamlariga o‘tkazgan. Haqiqat shundaki, u dastlab o‘g‘irlangan pullarni uy sotib olish uchun sarflay boshlagan, keyin esa mehmonxona va sayohatlar, Amazon orqali turli tovarlar xarid qilish kabi shaxsiy ehtiyojlariga yo‘naltirgan.

Biroq voqeaning eng ajablanarli jihati – ayolning ta’kidlashicha, umumiy mablag‘ning qariyb 400 ming dollari sevimli TikTok blogerlariga sovg‘alar sotib olishga sarflangan. Grinollning advokati mijozining xatti-harakatlari, aniq dalillar mavjud bo‘lmasa-da, aynan TikTok'ga bo‘lgan qat’iy qaramlik tufayli yuzaga kelganini qayd etdi.

Kompaniya rahbariyati daromaddagi pasayishni dastlab bir necha yil davomida payqamagan. Birinchi noqonuniy o‘tkazmadan keyin ham, Grinoll rahbarlarga izoh berish o‘rniga tekshiruv o‘tkazishni va’da bergan, ammo ayni paytda 27 ming dollarlik oxirgi tranzaksiyani amalga oshirgan. Keyinroq qarindoshining kasalligi sabab ofisni tark etib, bir hafta o‘tgach o‘zi politsiyaga borib, sodir etgan firibgarligini tan olgan.

Sud jarayonida ma’lum bo‘lishicha, Ketrin Grinollning bu harakatlari 1995 yildan beri faoliyat yuritayotgan kompaniyani to‘liq bankrotlik holatiga olib kelishi mumkin edi. Agar shunday bo‘lganida, 30 nafardan ortiq ishchi ishsiz qolgan bo‘lardi. Sud ayblanuvchining avval hech qachon jinoyat sodir etmagani va ikki voyaga yetmagan farzandi borligini inobatga olgan bo‘lsa-da, kompaniyaga yetkazilgan zararning ulkanligi tufayli ayol qamoq jazosiga tortilishi mumkinligi ta’kidlandi.

Buyuk Britaniya ommaviy axborot vositalarida bu voqea ijtimoiy tarmoqlarga, xususan TikTok'ga qaramlikning qay darajada og‘ir oqibatlarga olib kelishi mumkinligini yana bir bor namoyon etdi. Bu holat nafaqat kompaniya rahbarlarini, balki butun jamiyatni internet orqali sodir bo‘layotgan ruhiy muammolar va moliyaviy xavflarga nisbatan yanada ogoh bo‘lishga undamoqda. “Zamin”ni Telegramʻda oʻqing!