Rossiyaning 29-iyul kechasi va erta tongda Ukrainaga uyushtirgan havo hujumlari natijasida kamida 25 kishi halok bo‘ldi. Eng yirik zarba Zaporijjiya viloyatidagi Bilenke qamoqxonasiga berildi — 16 mahbus halok bo‘ldi, 50 dan ortig‘i jarohat oldi.
Adliya vazirligi qamoqxonaga to‘rtta bomba tushganini, ovqatlanish zali, boshqaruv binosi va karantin hududi vayron bo‘lganini bildirdi. 44 kishi kasalxonaga yetkazilgan. Ukraina inson huquqlari komissari qamoqni nishonga olishni xalqaro gumanitar huquqning qo‘pol buzilishi, deb baholadi.
Xarkiv viloyatida gumanitar yordam olish uchun yig‘ilgan odamlarga raketa hujumi uyushtirilib, 5 kishi halok bo‘ldi. Dnipropetrovsk viloyatida shifoxonaga tushgan raketa 3 kishining, jumladan, 23 yoshli homilador ayolning umriga zomin bo‘ldi.
Zelenskiy bayonotida Rossiyani tinchlikka majburlash uchun qat’iy sanksiyalar zarurligini aytdi. U “bu hujumlar sulh bo‘lishi mumkin bo‘lgan paytda sodir bo‘lmoqda”, dedi.
Bu orada AQSh prezidenti Donald Tramp Rossiyaga sulhga kelish uchun 8-avgustgacha muhlat belgilaganini e’lon qildi. Aks holda keng qamrovli iqtisodiy sanksiyalar kiritilishi mumkin.
Rossiya hujumlar ortidan Ukraina hududlariga chuqurroq kirib borganini bildirgan. Moskva Malivka qishlog‘ini egallaganini aytmoqda, ammo Kiyev bu da’volarni rad etdi.
