Ukrainadagi urush maydonlarida Rossiya tomonida ishtirok etgan o‘zbekistonlik fuqaroga sud tomonidan hukm o‘qildi. Uning taqdiri jamoatchilik orasida turli muhokamalarga sabab bo‘lmoqda.
Ma’lumotlarga qaraganda, 24 yoshli yigit 2024 yil oktyabr oyida ish izlab Rossiyaga yo‘l olgan. Biroq u yerda qonuniy ishga joylashish o‘rniga, Rossiya Mudofaa vazirligi bilan harbiy xizmatga oid shartnoma imzolagan va natijada Ukrainadagi urush harakatlarida faol ishtirok etgan.
Sud tomonidan u O‘zbekiston Respublikasi Jinoyat kodeksining 154-moddasi, 1-qismiga asosan aybdor deb topildi. Mazkur moddaga ko‘ra, chet elda harbiy harakatlarda yollanma tarzda ishtirok etgan shaxslarga nisbatan qattiq jazo belgilangan.
Sud qarorining matnida quyidagicha qayd etilgan:
– Ushbu fuqaroga 4 yil muddatga ozodlikni cheklash jazosi tayinlansin.
Ta’kidlash joizki, O‘zbekiston qonunchiligida «yollanish» deb ataluvchi jinoyat uchun 5 yildan 10 yilgacha ozodlikdan mahrum etish kabi qattiq jazo turlari nazarda tutilgan. Sud bu holatda ozodlikni cheklash bilan kifoyalangan bo‘lsa-da, bu fuqaro erkin harakatlanishi va yashash joyini o‘zgartirish huquqidan mahrum bo‘ladi.
Ayni paytda, mazkur holat nafaqat huquqiy, balki axloqiy jihatdan ham jamiyatda ko‘plab savollarni keltirib chiqarmoqda. Nima uchun yoshlar xorijga ish izlab chiqib, begona urushlarda hayotini xatarga qo‘ymoqda? Ularga yetarli ma’lumot va tushuntirish ishlari olib borilayaptimi?
Bu voqea butun jamiyat uchun jiddiy saboq bo‘lishi kerak. Yoshlarimizning hayotini asrash va ularni shunday xatarli yo‘llardan ogoh etish barcha mutasaddi idoralar va jamoatchilikning umumiy vazifasiga aylanmog‘i zarur. Chunki bir inson taqdiri – butun millatning yuzi, kelajagi va orzularining aksidir.
“Zamin”ni Telegramʻda oʻqing!
