AQSHning eng yirik va gavjum shaharlaridan biri — Nyu-York markazida kecha tun yangragan otishma shahar ahli va sayyohlarni hayratga soldi. Mashhur Tayms-skver maydonida 9 avgustga o‘tar kechasi sodir bo‘lgan hodisa ko‘pchilik uchun to‘satdan va qo‘rquvli lahza bo‘ldi.
Ma’lumotlarga ko‘ra, voqea mahalliy vaqt bilan taxminan soat 01:20 da Manxettenning 44-g‘arbiy ko‘chasi va 7-avenyu chorrahasida yuz bergan. Guvohlarning aytishicha, ular dastlab bir necha marotaba otish ovozlarini eshitishgan, shundan so‘ng odamlar turli taraflarga tarqalib qocha boshlagan.
Otilgan o‘qlar natijasida 18 yoshli qiz, 19 yoshli yigit va 65 yoshli erkak turli darajadagi jarohatlar oldi. Ma’lum qilinishicha, qizning bo‘yniga o‘q yaqindan tegib o‘tgan, yigitning o‘ng oyog‘i, keksa erkakning esa chap oyog‘i yaralangan.
Politsiya hodisa joyiga tez yetib borib, gumonlanuvchini qo‘lga oldi. Har uchala jabrlanuvchi ham tez yordam orqali Belvyu shifoxonasiga yetkazilgan va hozirda ularning ahvoli barqaror deb baholanmoqda.
Guvohlardan biri jurnalistlarga hodisa vaqtida uning oldida turgan avtomashina yoppasiga teshilganini, oynalarida esa o‘q izlari paydo bo‘lganini aytgan. Bu esa hodisa qanday kuch bilan sodir bo‘lganini yanada tasdiqlaydi.
Ijtimoiy tarmoqlarda tarqalgan videolarda “Hard Rock Cafe” yonida yurgan odamlar o‘q ovozlari yangragandan so‘ng yugurib qochayotgani aks etgan. Yana bir videoda esa yerda yotgan yarador yigit shifokorlar tomonidan tez yordam mashinasiga olib ketilayotgani ko‘rinib turadi.
Tayms-skverdagi ushbu tungi fojia shaharda xavfsizlik choralarini yanada kuchaytirish zarurligini ko‘rsatmoqda. Nyu-York politsiyasi hozirda tergov ishlarini olib bormoqda, gumonlanuvchining maqsadi va hodisaga olib kelgan sabablarini aniqlashga harakat qilmoqda.
“Zamin”ni Telegramʻda oʻqing!
