Rossiyada hayratlanarli tibbiy holat qayd etildi. Nijniy Novgorod shahrida yashovchi bir erkak boshiga uzunligi 12 santimetrlik ulkan mix kirib ketishiga qaramay, tirik qoldi. Bu voqea shifokorlar tomonidan haqiqiy mo‘jiza sifatida baholanmoqda.
Ma’lumotlarga ko‘ra, jarrohlar operatsiyani neyroxirurgiya bo‘limi mudiri Aleksandr Lavrenyuk va tajribali shifokor Pavel Smirnov rahbarligida amalga oshirishgan. Amaliyot uch soatdan ziyod davom etgan bo‘lib, mutaxassislar bemorning bosh suyagidan mixni ehtiyotkorlik bilan olib tashlashga muvaffaq bo‘lishgan.
Operatsiyadan keyin bemorning ahvoli og‘ir bo‘lgan. U shifoxonada jami 53 kun davolandi, shundan 40 kuni reanimatsiya bo‘limida koma holatida o‘tgan. Tabiblarning qat’iyatli sa’y-harakatlari va uzoq reanimatsiya choralari natijasida erkak hayotga qaytarildi.
Hozirda bemor reabilitatsiya jarayonidan o‘tmoqda. Dastlabki ma’lumotlarga ko‘ra, u jismoniy holati barqaror bo‘lib, sekin-asta kundalik hayotga qaytmoqda. Shifokorlar esa bu holatni nafaqat tibbiy muvaffaqiyat, balki kuchli iroda va hayot uchun kurashning yorqin namunasi sifatida baholamoqda.
Mutahassislar ta’kidlashicha, mix kabi qattiq predmetning bosh suyagidan o‘tishi ko‘p hollarda inson hayotini yo‘qotishga olib keladi. Biroq bu holatda kutilmagan mo‘jiza yuz berdi — hayotiy muhim a’zolar zararlanmagan va jarrohlarning professional ishi bemorning hayotini saqlab qoldi.
Tabiiyki, bu voqea nafaqat Rossiya, balki butun dunyo tibbiyoti tarixida o‘ziga xos misol bo‘lib qolishi mumkin.
“Zamin”ni Telegramʻda oʻqing!
