AQSH Kongressiga nomzod Valentina Gomes olovpurkagich bilan Qur’oni Karimni yoqib yubordi, deb xabar berdi “Timeline Daily”.
Texas shtatidagi Respublikachilar partiyasi nomzodi bo‘lgan Gomes videoda qo‘lida olovpurkagich tutgan holda muqaddas Kitobni yoqib yuborishi ko‘rinadi. Rolikda u Texasda islom dini “butunlay tugatilishi kerak”ligini ham ta’kidlagan.
Gomes AQSH Kongressi Vakillar palatasiga Texasning 31-okrugidan saylovga qo‘shilmoqda. U musulmonlarni “xristian davlatlariga zo‘ravonlik orqali tahdid solayotganlikda” ayblab, tarafdorlarini uni qo‘llab-quvvatlashga chaqirayotgani qayd etilgan.
Videorolik ijtimoiy tarmoqlarda katta norozilik uyg‘otdi. Jamoatchilik va huquqshunoslar Gomesning harakatini diniy e’tiqod erkinligiga tahdid va nafrat qo‘zg‘atuvchi xatti-harakat sifatida baholashmoqda. Ushbu voqea AQSHda diniy erkinlik va qonun doirasida keng muhokamalarni boshlab berdi.
Eslatib o‘tamiz, shunga o‘xshash voqea avvalroq Fransiyaning Viyyorban shahrida ham sodir bo‘lgan edi: noma’lum shaxs masjiddan Qur’oni Karimni o‘g‘irlab, uni yoqib yuborgan. Bu holatlar xalqaro miqyosda diniy bag‘rikenglik va tinchlik mavzularini yanada dolzarb qiladi.
“Zamin”ni Telegramʻda oʻqing!
